E lua tausaga ua faapafala ai e le faamasinoga le faia o sana faasalaga faasaga i lē sa avea ma Minisita o Faasalalauga, le Soifua Maloloina faapea ma Fesootaiga Faatekonolosi ma le Faalapotopotoga o Taui o Faalavelave Faafuasei, le tofa Mulitalo Siafausa, a o avea ma faipule o le Palemene. O le faaiuga lea ua toe faia e le Faamasinoga Maualuga ina ua faia se poloaiga a le faamasinoga o talosaga apili ina ia toe faia se isi faaiuga talafeagai i moliaga e sefulu o le faia o ni aga matagā, poo le unlawful sexual acts na faamaonia. E pei ona silafia o le tamaitai na tagi faasaga i lea tamalii sa faafaigaluega e lē ua molia i le taimi na tupu ai le solitulafono.
O le faaiuga lona lua lea a le faamasinoga, e ese mai le iuga muamua na faasala ai Mulitalo e na te faia ni galuega mo le lelei o tagata lautele e aunoa ma se totogi, ma totogi atu le tolu afe o se taui, i le tamaitai na ia faia i ai le solitulafono.
Na faaalia i folasaga a le faamasinoga ua mae‘a ona faia e Mulitalo le finagalo muamua o le faamasinoga i le tuli o itula faigaluega fua, ma totogi le $3,000. Ae i se tasi o mataupu sa tuua mai i le masina faaiu o le tausaga ua mavae atu nei, o le faaiuga faasaga i le moliaga e tasi o le faaoolima matagā faasaga i le afioga Le Mamea Dr Emosi Puni, na faamaonia.
O le faasalaga a le Faamasinoga Maualuga o le nofosala o lea tamalii sa avea ma fomai sinia i le 12 masina i le falepuipui. O le faatoa fofogaina lea o le faasalaga a le faamasinoga ina ua mae‘a ona iloiloina le apili a lē ua molia ma ana loia ma teena ai le apili faasaga i le faaiuga a le faamasinoga maualuga na faamaonia ai le moliaga e tasi o le faaoolima matagā o le alii fomai.
O le moliaga o le alii fomai e mafua i se tagi a se tina talavou na vaaia e lē ua molia lona maitaga tau tamaitai i le fitu tausaga ua mavae. Na vaaia le tina talavou e lē ua faasalaina ma faamaonia lana solitulafono, a o pulea le falemai tumaoti o le Medcen i Vailima e le afioga Le Mamea Emosi Puni.
O le faamasinoga o le tofa Mulitalo Siafausa ma le afioga Le Mamea Dr Emosi Puni, o nisi ia o toe mataupu sa tuua mai galuega tau faaiuiu a le faamasinoga o le tausaga na tea nei. O le afā o Eveni na mafua ai ona tolopo faaiuga a le faamasinoga i ia mataupu, ae na faatoa fofogaina i le vaiaso na sosoo ma le vaiaso na agi ai le afā o Eveni i le masina na tea nei o Tesema 2012.
O le vaiaso fou e faatoa toe amata ai galuega a le faamasinoga i Samoa i le tuanai o aso malolo o le Kerisimasi ma le Tausaga Fou.
