Lua tausaga e toesea ai ile a’otauina mo le galuega faafaifeau S.M.S

Susuga ia Le’au Kolose Toso pito i luma ma nieces & nephews ma si ona tina ia Elisa ma ona aiga, faapea le susuga ia Vaotā Tofaeono, lona lua mai le itu agavale, si ona faletua & nofoaalo ma aiga ile malaevaalele o Brisbane faamavaega ua tuua Kuiniselani mo le a’otauina ile galuega ale Atua i Aukilani
Susuga ia Le’au Kolose Toso pito i luma ma nieces & nephews ma si ona tina ia Elisa ma ona aiga, faapea le susuga ia Vaotā Tofaeono, lona lua mai le itu agavale, si ona faletua & nofoaalo ma aiga ile malaevaalele o Brisbane faamavaega ua tuua Kuiniselani mo le a’otauina ile galuega ale Atua i Aukilani

(Le’au Kolose Toso & Vaotā Tofaeono)

E lē taugofie i aiga ma uo faapea fanau aemaise le ekalesia SISDAC a Kuiniselani, le valavala ile 2 tausaga ma le susuga lea ia Le’au Kolose Toso faapea Vaotā Tofaeono, ona ole a’otauina mo le galuega ale Atua.

E talitonu lava le taofi oloo molimau i laua oloo soifua le Atua nate tausia o laua aiga a’o toesea mo le 2 tausaga auā o laua, sa faamoemoe iai le tausiga o aiga ma ekalesia i itu faaletino faapea le faaleagaga.

Na o i la’ua sui ole matagaluega a Kuiniselani ua ma’oti mai ile taimi nei. Ole po ole Aso Lulu na tea nei sa faamavae ai ma le matagaluega ona taumavae lea ma a laua ekalesia ile faaiuga ole vaiaso ae ole Aso Sa, 5 o Mati na tuua ai loa Brisbane mo Aukilani i Niu Sila. Ole a aumau lava ile nofoaga autu ole lotu i Magele, o iina foi ole a a’otauina ai faatasi ma nisi sui mai isi ekalesia ma matagaluega.

O laua uma sa avea oni mautofi faamoemoeina ile komiti ale autalavou SISDAC ile matagaluega a Kuiniselani, oni tiakono sa lima taumatau iai faifeau ma taitai toeaiina i totonu o a la ekalesia, aemaise le matagaluega, peitai sa lei avea lea ma ala e taofia mai ai i laua ile naunauta’i ile la miti ua mae’a ona teufatu.

Ole susuga ia Vaotā Tofaeono ua malilie faatasi ma si ona faletua ia Felila Asiata Tofaeono faapea le nofoaalo, ole a va i vasa mo le lua tausaga ona ole fia a’otauina mo le galuega ale Atua auā ua pa’e le saito ae ua toaitiiti le aufaigaluega.

Ose mamoe ale susuga ile taitai matagaluega, Pr Misa Luao Matai’a ma le faletua ia Emo ole ekaleia (local church) a Annerly.

Ole susuga ia Le’au Kolose Toso e tau matuu mai auā e lei faia sona aiga ae oloo tausi pea i nai ona tuaa faapea le mafutaga ma tuafāfine ma le aiga. E tuua e Le’au Kuniselani mo le galuega faafaifeau i Aukilani, oloo faigaluega ile ekalesia (local church) a Leighchardt lea oloo tausia ele susuga ia Pr Lagolago ma le faletua ia Puataunofo Levae, o laua sa avea ma taitai matagaluega a Kuiniselani ile tele o tausaga.

O oulua māmā na Le’au Kolose Toso ma Vaotā Tofaeono auā le a’otauina o oulua mo le galuega ale Atua. Ua nofo tatalo lua aiga faapea ekalesia ma le matagaluega ina ia tini lau o lua faamoemoe. Ia faamanuia tele le Atua!