Auvoli Faafafine Auckland Diamonds Team 2 siamupini i le Teuila ma le Sisigafu’a 2018

Auvoli Faafafine Auckland Diamonds Team 2 siamupini i le Teuila ma le Sisigafu’a 2018

E lei iai se ‘au a faafafine i Samoa ma Tutuila tatalia le malolosi o tau’au o faafafine i Niu Sila nei na mafua ai ona sola mai ma Ipu e lua o le taamilosaga o auvoli a faafafine i Samoa i le Sisigafu’a ma le Teuila i lenei tausaga. O taamilosaga nei ua faapitoa lava mo faafafine lea ua faaigoaina le latou taamilosaga o le taamilosaga a Queen.

Ua tolu ai nei o tausaga o malaga i Samoa ‘au e lua a faafafine mai i Aukilani lea ua faaigoaina o le Auckland Diamonds, e ese mai i le isi ‘au e tasi a faafafine i Aukilani ua faaigoaina foi o le Auckland Samoa. E ono ‘au sa auai i lenei taamilosaga e aofia ai ‘au e tolu i Niu Sila nei, tasi mai Tutuila ma le lua ‘au mai Samoa.

O ‘au e lua a le Auckland Diamonds o loo faafefiloi ma isi faafafine mai Ausetalia faapea ma Samoa, ae sa vaevaeina i ‘au e lua o le Team 1 ma le Team 2. Ua sosoo nei tausaga e tolu o siamupini pea le Aucklands Diamonds Team 2 i le taamilosaga a le Sisigafu’a ae sa tele lava ina tulua i le taamilosaga a le Teuila ae siamupini ai le ‘au a faafafine mai Tutuila le Original.

Sui o le komiti faafoe ma le peresetene fou o le taamilosaga o auvoli a Queen le susuga ia Latifah Sai Afoa

Sui o le komiti faafoe ma le peresetene fou o le taamilosaga o auvoli a Queen le susuga ia Latifah Sai Afoa

O le tausaga ese la lenei i le tapenaga sa iai le osofai malosi a le Auckland Diamonds i le latou taumafai lea e saili se avanoa e faatietie uma mai ai Ipu e lua o le taamilosaga i Niu Sila nei se’i faamalulu toe faafoi ai i Samoa i le tausaga fou. I le taamilosaga a le Sisigafu’a e lei mafai ona ave  esea ai le malosi tele o le ‘au a le Auckland Diamonds Team 2 i le latou toe fianauina o le tulaga muamua ina ia puipuia ai pea le latou Ipu, lea lava sa tau lau o le latou faamoemoe e pei ona toe suipi ai i lenei tausaga.

Ae na oo mai i le taamilosaga a le Teuila sa toe manatu ai le Aucklands Diamonds Team 2 e tatau lava ona latou faamutaina le malosi o le ‘au a mala mai Tutuila le Original lea sa sosoo lava tausaga e tolu o latou faaevaina le Ipu i Tutuila. I le finau ma le loto malolosi o le Auckland Diamonds Team 2 na latou faamutaina ai loa le fiafia o le Original mai Tutuila i le semi-final ae faapuupuu e le isi ‘au a le Aucklands Diamond Team 1 le fiafia o le Auckland Samoa i le isi semi-final.

Na toe saili siamupini lava ‘au e lua a le Auckland Diamonds Team 1 ma le Team 2 ma o lea sa siamupini ai loa le ‘au a le Auckland Diamond Team 2. O le faatāuaina tele i Samoa o taaloga mo le itu pa o faafafine o loo maualuga ai pea le agiagia o le fu’a o le lelei o le taleni o loo iai foi nei alo ma fanau o le atunuu.

O le masina o Ianuari i le tausaga fou i le 2019 o lea ua fuafua e le asosi o taaloga volipolo a Samoa e fai ai le laugatogi faapitoa mo taaloga nei a le Teuila ma tufatufa ai faailoga. Ae ua sauni foi le Auckland Diamonds Team 2 e puipui a latou Ipu ia e lua i taamilosaga faapitoa a Samoa i le Teuila ma le Sisigafu’a ina ia auā ne’i toe mamulu.

O le agaga fiafia foi i faafafine i Niu Sila nei i le tāua o nei taaloga o loo mafai ona mafuta faatasi ai faafafine uma mai atunuu eseese aemaise lava ia Samoa, auā o se avanoa lelei e taaalo ma aai faatasi ai ae o loo maua ai foi le mafutaga fiafia mo faafafine uma.

E le na o taaloga lona tāua ae o le mafutaga ia maualuga ma fealofani ai ma fiafia ai queen uma o Samoa o loo ta’ape i itu e fa o le lalolagi, o le ala foi lea o le faaigoa o le taamilosaga o le taamilosaga a Queen.