O le alii muamua e mai i le afioaga o Papa Sataua ma na ta‘ua e Leoleo e masalomia le malemo, o le mafuaaga o le uma o lona ola. O le ‘agaga ua matua faaletonu lava amu ma aau, na mafua ona faaaogā e le toatele ona o faasalalauga faalauiloa a le Ofisa o le Faigafaiva na pu‘e ai le ata o le alii lenei ma nisi sui o le Ofisa o Faigafaiva i le sami, ona o fautuaga i le atunuu i le soona fagota o ogasami o le atunuu.
Ae o lea ua toe maliu lava lenei alii i le sami. O le lipoti a Leoleo e foliga mai sa iai se faaletonu i le tasi o vae o lenei alii ma tulai mai ai ma se faaletonu ma maliu ai lava lenei alii.
O se faigafaiva a lea alii ma nisi o lo latou nuu na tulai mai ai ma le faalavelave.
O le isi maliu o se alii na faapea ona masalomia le pule i le ola, peitai e foliga mai o se faalavelave na mafua ai lona maliu.
E fafagu atu i le Aso Sa na tea nei e nofo i luga e fai le faapusa a le latou aiga, ua uma lona ola ae o loo i ona autafa se fagu sipili.
O fagu nei o vailaau ua faaaogā i le fufuluina o masini e pei o DVDs ma leitio. E foliga mai ua inu e le alii lenei le fagu sipili a o faasuaava foi. E ui i lea, o le vaiaso lenei e fai ai se taotoga o lenei alii e saili ai le mafuaaga tonu lava o lona maliu.
O le tausaga na tea nei e toatolu foi ni alii na onanā ma e toatasi na maliu ai lava i le inu o lea vailaau, lea e tele ina susunu e nisi ona inu ai lea i tausaga ua mavae, peitai ua lapataia le atunuu e aua le inuina ia ituaiga o vailaau ona e le o iai se saogalemu i lea gaoioga.
