O ituaso e taoto lelei ai aupeau, o ituaso foi e lagalaga ai le sami ma tu lili peau o le vasa, peitai o ituaso o le tulili o peau, o ituaso ia o le TAUTAI, Iesu Keriso ua avea ma Tumutumu o autalavou uma.
I le usuia ai o se tasi o fonotaga a le mafutaga a faifeau i totonu o Kalaiesetete, sa tulimatai ai le vaai faaleagaga i le manatu ia faia se lotu tuufaatasi a autalavou mai tatou ekalesia eseese e mafuta ai tupulaga uma ma saunia mai faaevagelia, pese lotu aemaise aitema faaleagaga.
O lea la faamoemoe sa faataunuuina i le St Paul’s Trinity Pacific Church Hall i le Aso Sa ua mavae atu, 17.10.2010, o le sauniga lotu faafetai sa taitaia e susuga faafeagaiga Lapana Faletolu, susuga Time Taotua (EFKS) sa fai ma fofoga o le polokalame, faatasi ai ma le sui taitaifono o le mafutaga faifeau, susuga i le toeaina ia Fitifiti Luatua (Ekalesia Sailimalo i le Atua PIC Samoa), sa malaga le taitaifono Rev Ale Palelei na lē mafai ai ona auai.
O le autū o le mafutaga sa faapena ona taulai uma i ai faaevagelia o lea po “Tupulaga, finau ma tauivi mo le Alii”, e sefulu autalavou na auai ma sa faatumulia le hall i lea afiafi matagofie i le felanulanuai o tapenaga a autalavou taitasi.
O autalavou nei sa auai, Metotisi Hallswell (Rev Poasa Leaupepe), Metotisi Addington (Rev Neru Tiatia), Metotisi Kalaiesetete (faifeau malolo Lasalo Tuilagi), Ekalesia Aso Fitu Koneferenisi (Pastor Kenneth Fuliese), Ekalesia Katoliko, Hornby, St James & Aranui Palisi (Afioga Patele Paulo Filoialii), AOG Linwood (susuga toeaina Talosia Vanilau & susuga Tavita Seumanutafa), autalavou Ekalesia Sailimalo PIC (susuga Fitifiti Luatua), Congregational Christian Church, Linwood (Rev Moega Lasei) faatasi ai ma le autalavou malosi St Paul’s Trinity Pacific Church, o loo taitaia e le susuga Lapana Faletolu, o i latou ia sa talimalo.
E lei auai nisi o autalavou EFKS ona sa tuatuagia i fuafuaga faaleekalesia i lea lava aso. Molimauina le feleiva eseese o sauniuniga a autalavou, aemaise nai fanau iti i le olioli mai o latou siva faaleagaga, tele foi nai vaaiga faaneiona po sa faatinoina e nisi o tupulaga talavou, ua faamalo le finau, faamalo le tauivi i mea lelei.
Na maitauina foi le mataala o le leoleoina o le saogalemu i lea afiafi e tupulaga o le ekalesia St Paul’s, aemaise nai toeaina matutua o le ekalesia lea sa taitaia e le susuga i le failautusi, tofa Laufiso Solimalo, talu ai o le fatu o le taulaga lea sa faia ai le faamoemoe, o se puipuiga mai le aai na luluina i le mafuie. E faafoi ai le viiga ma le faafetai i le Atua ina ua faataunuuina i le manuia le mafutaga 2010.
