O se lotu tamaiti faanoanoa na molimauina i ekalesia i le Mata Aleipata i le Aso Sa na tea nei, 11 o Oketopa 2009, ona e lata i le 40 fanau i nuu o le itumalo Aleipata na aafia i le galulolo na fano ola, ma ua le aulia ai le Aso Sa e faasino mo i latou.
O le sauniga taeao mo le lotu tamaiti a le EFKS i Saleapaga na molimauina le pepese fiafia o fanau a o agai atu i le falesa, ae sa vaaia loimata o le faanoanoa ina ua faagasolo le sauniga ona o fanau ua motusia le mafutaga ma matua ma aiga ona o lea faalavelave faalenatura.
E toa 25 fanau a Saleapaga na uma ola i le galulolo ma sa tolaulau o latou igoa e le faafeagaiga le susuga Uaea Isaraelu ma tutulai fifilemu ai le aofia mo le minute e tasi e faaaloalo ai i nai fanau ua maliliu.
E faapena foi vaaiga i le lotu tamaiti a le EFKS i Lalomanu lea na faaalia e le susuga i le faifeau toeaina, o Isaia Tiatia e toa 25 fanau ua fano soifua i le faalavelave.
“Soia tatou te faanoanoa ua i aao o le Atua a tatou fanau”, o se mau lea a le susuga i le faifeau o Uaea a o tutulu ma tolaulau suafa o fanau a le nuu ua maliliu.
O se faamalosiau foi lea mo nai matua ua le vaaia mata o nai o latou alo ma fanau ona ua momotu e le oti le mafutaga e mafua i mala faalenatura.
A o tolaulau suafa o nai fanau ua maliliu, sa molimauina foi e le tusitala le agai atu o se tasi tina talavou ma teu fugalaau ma ie leise ua faataatitia i luma mai o le pulelaa, e avea o se faailoga o lona faavauvau tiga i se vaega o lana fanau ua amia ona o le galulolo.
E leai se isi o le faapotopotoga e lei tutulu ma foliga o le faanoanoa na ufitia ai le sauniga taeao a le fanau.
O le lotu tamaiti a le EFKS i Satitoa, e ui ina malepe le malumalu ae sa faataunuu lava le faamoemoe o le fanau i si fale Samoa laititi ua faasee i ai le faafeagaiga ma lona faletua ma o la alo, lea e toatolu tamaiti o le ekalesia na maliliu i le faalavelave.
“Na amata lava le sauniga i le vaaia o loifofoga maligi o matua ma fanau ona o le mafaufau alofa i nai tamaiti ua le mafuta i lenei Aso Sa mo i latou”, o le finagalo lea o le susuga Afaese Falanaipupu le faafeagaiga o le EFKS i Satitoa.
“E toatolu lava nai fanau a lenei ekalesia ua fano soifua i le faalavelave ae ou te le o iloa la i isi ekalesia o le nuu nei”.
O lotu tamaiti i tausaga uma e fai ai lafolafoga a le fanau mo se meaalofa mo le faifeau faapea foi tupe e maua mai i tala ma pese aualofa a aiga i e ua maliliu. Peitai na taofi uma e le faafeagaiga EFKS a Saleapaga le susuga Uaea Isaraelu ia tulaga masani ona o lona alofa i mafatiaga o aiga lotu mai le galulolo.
Sa faasilasila ane lava e se tasi o matai o le aulotu lea manao o le faifeau ma le faaupuga e le taofia ai lava le aiga latou e fia ave se latou meaalofa i se taimi e talafeagai ai.
O le EFKS i Lalomanu na molimauina le aao mafola o aiga i Ipu faamanatu mo nai o latou tagata ua maliliu i le faalavelave, aemaise o meaalofa masani a le fanau mo le faifeau ma lona faletua.
O se tasi lea o ekalesia sa tumutumu ai le toatele o aiga ma fanau mai atunuu mamao ona sa malaga mai e fia faatasi ma o latou tagata ua maliliu i le galulolo, aemaise o le fia mafuta mai i aiga ua mafatia i le faalavelave.
O le Aso Sa lava la ia o le lotu tamaiti o le 2009 ua faamauina nei i talafaasolopito o faalavelave faalenatura i Samoa o se Aso Sa uliuli ona o nai fanau ma tagata o aiga ua fai i lagi le folauga ona o le faalavelave na tulai mai i le taeao o le Aso Lua, 29 o Setema 2009, ona e le gata o fanau a le Mata Aleipata, ae faapea nisi o fanau na maliliu i afioaga o Poutasi Falealili ma Saaga i Siumu e mafua mai lava i sauaga a le galulolo.