E viia pea le alofa ma le agalelei o le Atua, ona o lana tausiga alofa i lenei Aoga Aso Sa EFKS Wainuiomata, i Uelegitone.
Sa faatumulia le malumalu i mātua ma aiga, uo ma ē masani latou te molimauina le aso faapitoa mo le fanau, le Aso Sa o le Lotu Tamaiti 2011.
Sa saunia e le faafeagaiga ia Rev Utupo Henry & Maressa Iputau faapea le mamalu i le aiga faiaoga le polokalame mo lenei tausaga, ua faatāua ai le Foafoaga Paia ma Tulafono a le Atua, tala i faamanuiaga a le Atua ia Aperaamo & Sara, ae faaiu i le tala i le Talisuaga ma le Alii. O le polokalame sa avea ai lava alo ma fanau, e taitai le sauniga atoa.
O se polokalame matagofie sa atagia ai le tele o taleni ma agavaa, aemaise i meaalofa a le Atua mo alo ma fanau.
Sa usuina foi e le fanau se pese e aualofa ai i le Tina Penisione mālōlō, ia Talalupe Matagi, ua tuua le mafutaga, e ala i le valaau paia a lo tatou Matai.
Faamafanafana pea le agaga o le Atua i le Tama Penisione mālōlō ia Tasi Matagi ma le aiga. Ia manuia tele alo ma fanau o lenei ekalesia, manuia mātua, faapea alo ma fanau a Samoa. Manuia le Aso Sa faapitoa mo le fanau!
