O Fanau o u fanafana o le Lumanai
A o lei taina le itula e ono i le taeao segisegi o le Aso Sa na se‘i mavae atu nei, a ua ala usu atu mātua ma nai fanau foi i le faataunuuina o le sauniga lotu faapitoa a mātua ma le fono tatalo masani a le faafeagaiga ia Savali Fenunuti Ioane ma le faletua ia Faaleava Taito Ioane ma le paia ma le mamalu o le aulotu EFKAS i Otahuhu.
O le sauniga lotu lenei a mātua, e talosia faapitoa ai fanau uma a le aulotu, o Ekalesia aemaise foi o fanau ma tamaiti uma o le lalolagi ona o lo latou aso faapitoa ua ta‘ua o le Aso Sa Paepae o le fanau.
O le loto faafetai tele la o aiga lotu uma o lenei aulotu, auā ua agai atu nei i le fitu tausaga talu ona faavaeina ma faatinoina lenei polokalame masani e le fanau, ae ua molimauina le tausiga alofa ma le agalelei lē tuuaunoa ma le lē faatuaoia o le Atua, auā o loo atoatoa pea le fuainumera o le faitau a le susuga i le faafeagaiga ma lona faletua i alo ma fanau o le la aulotu e ala i le leai lava o se tamaititi ua toesea i le finagalo fai toatasi o le Atua.
O le tele foi o lagona faafetai ona o faamanuiaga a le Atua i fanau e ala i lo latou ola taumafai ma le ola fia sailiili mo le Atua i lo latou taupati atu pea i fuafuaga fai a le Aoga Aso Sa.
O le Aso Sa Paepae o le fanau, e ui lava ona o tausaga uma e faataunuuina ai, ae e lē tuuina ai lava le faaalia o le matua faitama o tamā ma tina i le sauniuniga ma tapenaina lelei o fanau e lē gata i o latou laei ma teuga ae faapena foi i sauniga o meataumafa lelei auā lava le faatāuaina o le aso ua faapitoa mo fanau.
E ese foi le matagofie o le faatinoga o le polokalame a le Aoga Aso Sa a Otahuhu (EFKAS) auā o le pauna ata i le malie o taga a le fanau laiti, ia ma le loifofoga maligi foi auā ua lagona le ootia ma le pa‘i mai o le agaga o le feau o le talalelei pei ona sa folafolaina mai e le fanau e ala i le faatinoga o tala.
E talitonu sa faapenaina uma lava foi i totonu o aulotu taitasi i Niu Sila nei, o le faamalosi a le fanau e saga fafagu atili mai ai i mātua ma tagata lolotu le finagalo alofa o le Atua ina ia mafai ona faaaogāina ma savavali ai mo le manuia o loo faatalitali mai o le malo o le lagi.
O le faamoemoe lava ia iloa e le fanau ona ola ia Keriso, aemaise ia mafai ona ola tauivi ma sailiili mo le Atua ina ia manuia o latou lumanai auā aiga, nuu, atunuu aemaise Ekalesia.
