Se vaaaiga matagofie ma le faafiafia loto, ina ua tini taunuu le faamoemoe o le faataunuuina lea o le lotu faamanatu a le Aiga Sa Matafeō i Aukilani i le faaiuga o le vaiaso.
O lea sauniga tāua o le atoaga lea o le tausaga talu ona toe faamaopoopoina i le mafutaga a le Aiga Sa Matafeō i Niu Sila. Sa vaaia le sagisagi fiafia o le toatele ina ua toe feiloai ma fevaaia‘i i lea aso.
O se faamatalaga i lenei mafutaga, sa uluai faavaeina e nisi lava o le aiga muamua, peitai ane ona o le faigata o fesootaiga i le atunuu nei na mafua ai ona motusia. I se fesootaiga ma nisi o loo i le komiti o le mafutaga i le taimi nei na ta‘ua ai e faapea, e lima faletama o suli moni o le Aiga Sa Matafeō ma o loo maua pea lava la i le taimi nei suli ia o le Aiga Sa Matafeō, ma o le agaga fiafia foi lea i le maopoopoga o le aiga i le lumanai.
O nisi la nei o loo faafoeina nei le mafutaga, o Tafili Pepe Asalemo, Malagamaalii Alefosio Nonumalo, Semi Vaotuua ma May Rosa Luapo. O le agaga fiafia o le komiti ina ua vaaia le mafuta faatasi o alo ma fanau, ina ia latou silafia lelei ai aiga.
E matagofie le taulaga o le Misasa e pei ona sa osia i le malumalu a le Ekalesia Katoliko i Papatoetoe, e lē gata i viiga o le Atua a o luitau faaleagaga mai ia Patele. I le taimi nei o loo avanoa pea le nofoa o Tavita, ina ua tuua le malo i le Sa‘o o le Aiga Sa Matafeō, le afioga ia Matafeo Ioakimo Matulino i le tausaga ua mavae; masalo o le tasi foi lea mataupu e ono oo i ai fuafuaga a le mafutaga i le tausaga fou ina ia vave ona tulai mai se tasi na te vaaia le maopoopoga o le Aiga atoa i se taimi vave.
O loo faaautu le mafutaga i ni taiala se tolu, e pei o le faatāuaina o le faafealofaniina o alo ma fanau, o le tulai mai o faafitauli o le toe nofoa‘i o fanau, ma le lē silafiaina aemaise ai lava o le nonofo fealofani o le Aiga Sa Matafeō i soo se mea.
Sa talosiaina faapitoa foi i lea aso i latou sa muai asaina le faigata ina ia manuia alo ma fanau o le Aiga Sa Matafeō i soo se mea lava, ona taualuga ai lea o le aso i le taumafataga tele sa mafuta fiafia ai suli aemaise faletama e lima o a le Aiga Sa Matafeō i Niu Sila.
