“Ia manatua meaalofa a le Atua ua foai mo lo tatou aiga”
O le auvaa potopoto ma le maopoopo o le tatou aiga, o le molimau atu lea i fanau lo tatou lalago faatasi i tofiga ma manatu, aemaise o le molimau atu, o fanau faaleagaga i tatou a le Atua, ua tino e tasi ia Keriso ma ua fusia i le alofa. O le alofa e malosi ai lo tatou sootaga i lo tatou va – tagata aemaise o le fesootaiga ma le Atua, Le ua Ia faia mea sili mo i tatou, lea e pei ona iai lenei aso tuupoina ua ofaga potopoto ai le aiga Sa Mulipola mo le latou lotu faamanatu, ua atoa i ai le 40 tausaga talu ona amataina, o le paia lava lea i le afio to’afa o alii ma le to’alua o tulafale ma upu ia fale Manono.
O le Aso Toonai na sei mavae atu nei i le vaitau o le Eseta na faatasia ai le mamalu tele o le aiga, i tuaa sinasina, o tama ma tina aemaise alo ma fanau, le gata i lea o ni paolo ma gafa e malu ai le aiga Sa Mulipola, o lupe foi sa vaoeseese lea sa faatasia i le Spencer Park i Kalaiesetete mo lenei faamoemoe taua.
E pei ona faailoa mai e le susuga Mulipola Aumua i le sui o le nusipepa, na uluai amatalia lenei faamoemoe i le tausaga 1970 ina ua a’e se faatofalaiga i le aiga.
O le uluai faavaeina o le sauniga lotu la sa faia lea i le St Pauls Trinity Church a o galulue ai le susuga i le faifeau Rev Kenape Faletoese ma le faletua o Faavaoa, lea ua atoa i ai le 40 tausaga i le aso.
O le autu o le lotu, ia faia i tausaga uma ina ia maua le mafutaga mafana ma le fealofaniga i totonu o le aiga, ia tupu ma ola le fatu aemaise ia maua nisi o le aiga e faaaogaina mo le Atua ma lona finagalo.
I tausaga e tele ua tuanai sa faia pea lenei sauniga taua i le malumalu St Pauls Trinity Church i lalo o le taitaina a le alii faifeau Rev Lapana Faletolu, ae talu ai ona o loo galueaina le falesa i le tele o itu e fia faaleleia, lea ua fai ai sina suiga i lenei foi tausaga ma sa faatumulia lava le Spencer Park ae o se aso foi ua susulu manaia le la ma maua ai pea le mafanafana, ae sili ai le mafanafana o le alofa o le Atua. E toatele aiga na malaga mai Samoa ma atunuu i fafo e pei ona iai i tausaga uma, ae mo lenei tausaga 2010, ua malaga mamao mai le susuga Mulipola ma le faletua Makerita e fai ma sui.
O nisi nei o tama sa faavaeina le lotu faamanatu pei ona faalauiloa mai: Mulipola Aumua Siaosi, Mulipola Seiuli, Leiataua Puaavase Aimalala, Lupematasila Faiesea, Lupematasila Laupau ma Aki Mamoe.
O se mafutaga matagofie tele sa maitauina i lea aso i le sagisagi fiafia o le aiga, ua tepa i ula, tago i ula aemaise o le toatele foi o tupulaga ma fanau laiti na iai, manaia foi le fofoga taumafa e ala i le latou barbecue, faatasi ai ma le mafuta fiafia i le vaiaso paia o le Eseta aemaise nai easter eggs mo le fanau.
E ao ai pea ona manatua mea ua faia e le Atua mo le tatou aiga ma le loto faafetai, e tofotofoina pea i tatou ma lo tatou faatuatua i taimi uma, ae ia maua pea le filemu o le Alii i o tatou loto. Ia manuia le alofaiva atu i polokalame ma fuafuaga lelei mo le aiga ma ia maua pea le maopoopoga ma le fealofaniga i le aiga, manatua ‘aua lava nei galo se mea e tasi o ana meaalofa.’
