Lotu Faamanatu a Sapapalii i Niu Sila

I le tau faaiuiu ai o galuega i le Aso Faraile, aso 24 o Aukuso na se‘i mavae atu nei, na matuā molimauina ai i le nofoaga tapuai a le Ekalesia PIPC Avondale le sauniga faamanatu ua masani ai tamafanau a le afioaga o Sapapalii, e lē gata i Lupe Faalele o le talalelei mai le afioaga a o alo ma fanau se‘i oo lava i le tino i matutua o loo faamautu nei i Niu Sila.

O se aso faagalogata lea aso, ona o lona talaaga i talafaasolopito o Samoa ina ua suluia Samoa i le talalelei, i le alii misionare o Ioane Viliamu.

Sa vaaia i lea afiafi le agaga sagisagi fiafia o le toatele ina ua maua le avanoa e toe luluaao ai ma nisi o le afioaga ua loaloa e lē o toe maua se fesootaiga.

Ua na o tala lava o Sapapalii ua faatumulia ai le nofoaga tapuai PIPC i lea afiafi, aemaise ai ua avea ma aso e faamanatu masani ae ua faailoa ai le toatele o alo ma fanau o le afioaga ua nofoaiga ma faamanuiaina ai i taulaga tagata. O se afiafi felanulanuai e lē gata i laei ae o le lalelei ma laufofoga fiafia o tagata o lea afioaga.

Sa taitaia le sauniga i lea afiafi e le susuga i le alii a‘oa‘o fesoasoani ia Folu Ailaoa na muai faafeiloai i le mafutaga i le aulia ai o le aso lotu faamanatu sosoo ai ma le taitaia o le sauniga lotu, o le viiga e 92 na pepese faatasi uma ai le mafutaga, sosoo ai ma le faitauina o le afioga paia a le Atua mai le feagaiaga tuai, Auega 3: 19-23.

O luitau faaleagaga sa avea ma manatu autū o lea afiafi, “Mai Faafitauli Faamanuiaga”….O upu faalaeiau i le tauiviga i le ola ai i totonu o faafitauli ae atagia ai faamanuiaga, na ta‘ua ai e le taitai le iai o le Atua alofa, e agalelei le Atua i ē saili ma faamoemoe ia te ia, aemaise ai le tatau ona iloa ola i faafitauli.

Na toe faamanatu e le taitai i le taufaaiuiuga …. “E lutia i puava ae mapu i fagalele”; na mae‘a lea ona valaauina faapitoa lea o se tasi o tamā o le afioaga o Sapapalii ia Aunuu Avia e molimau i lea afiafi e fai ma sui o le afioaga i le tāua o le lotu faamanatu i tausaga taitasi aemaise le faamalosiau i alo ma fanau, tamā ma tina ma soo se Sapapalii i le tāua o le aso ma le talalelei.

O tatalo faafetai, faatoesega ma manaoga sa saunia e alii A‘oa‘o fesoasoani mai lava i le afioaga o Sapapalii ia Ainuu Avia, Seiuli, ma le alii a‘oa‘o fesoasoani ia Muliafatele Taulapapa Siona talosaga o lea afiafi.

Sa matuā faafiafiaina le afioaga o Sapapalii i lea afiafi ina ua mafai ona latou feiloai ai ma le alo tamaitai o le latou faafeagaiga i Sapapalii i lea lava po.

Sa aoina foi le taulaga masani i lea po a o usuina le viiga 158, faaiuina lea sauniga lotu i le tatalo, ona alo loa lea o le mafutaga i se taumafata māmā sosoo ai ma le fonotaga i fuafuaga faataatitia mo le agai i luma o le mafutaga a Sapapalii i Aukilani i Niu Sila.

Silia i le $5,000 se taulaga na aoina i lea po ma le faamoemoe i se taimi i le lumanai o lea faapena ona tauaao atu i le afioaga i Samoa i Sapapalii mo galuega fai. Tumau atu pea i le Atua lona lava viiga ina ua aulia ma le fiafia le lotu faamanatu a Sapapalii i lenei tausaga 2012.