E le o nofonofo lelei le au tetee i le tulafono o le a suia ai le itu o le auala e feoai ai taavale i Samoa, i le faia o tapenaga talafeagai mo le finauina o le taofia o le faamoemoe o le Malo e faatino le suiga fou. Ua faaalia e le alii loia sa avea muamua ma taitaifono o le au tetee lea e taua o le PASS (People Against Switching Sides) le susuga Mapusua Toleafoa Solomona To’ailoa, o loo mafanafana le latou itu e malolosi a latou mau o le a tuuina atu i le faamasinoga e faamautu ai le latou finauga e soli faavae le tulafono a le Malo o le a faatino ai le suiga o feoaiga i luga o alatetele.
E le o nofoai foi le PASS i le faaoloolomaau pea i le alii Palemia ma le faigamalo, ina ia tafa so latou finagalo ae faataatia le suiga o le itu auala sei maea ona tagofia e le faamasinoga le latou talosaga. Ua sauni nei le alii faamasino sinia o le faamasinoga maualuga o Vui Clarence Nelson, e suesueina le tagi a le PASS, ina ua tau fai malilie uma loia a itu e lua e ave le faatuatuaga i le alii faamasino na te tagofia ai le iloiloina o molimau e aunoa ma so latou agaga tetee ona o sootaga o le alii faamasino ua maea ona ia faailoa i se taimi e lei mamao atu, i se tasi o le PASS le susuga Papalii Dr Viopapa Anandale Atherton, o loo avea ma Peresitene.
O le finagalo foi lea o le alii Palemia susuga Tuilaepa L Sailele Malielegaoi, na faailoa i se feiloaiga ma tusitala, o le ave o le faatuatuaga ma le talitonuga o le Malo o loo faasaga i ai le tagi a le PASS, e faatino ai tiute o le alii faamasino ia Vui Clarence, aua ua maea ona tauto ma e leai se tulaga o le a fesiligia ai fua lona faamaoni. Sa valaauina le tagi a le au tetee i luma o le Faamasino Sili le afioga Patu Tiavaasu’e Falefatu Sapolu, mo le faatulagaina o se aso e suesueina ai molimau o le mataupu, peitai sa faailoa e le faamasino sili le iai o ona aafiaga ia i latou o loo aafia i le faamasinoga a le PASS ma e le mafai ai ona ia tauaveina.
Ua le mafai foi e le tasi o faamasino o le faamasinoga maualuga le afioga Lesatele Rapi Vaai, ona tauave le mataupu talu ai ona foi aafiaga poo conflict of interest. Seia vagana ai le afioga Vui e iai foi ona aafiaga, ae ua malilie le Loia Sili a le Malo ma loia a le PASS na te tauaveina le tagi faasaga i le suiga o le itu auala. O le aso 17 o Aukuso 2009 o le a amata ai ona tagofia le mataupu i le faamoemoe e tolu aso e valaauina ai molimau ma tuuina atu ai folasaga faaiu a loia a itu e lua. Na faaalia e le alii faamasino le afioga Vui Clarence, o le a aumai se faaiuga a le faamasinoga i le finauga a o lei amatalia le suiga i le aso 7 o Setema 2009 e pei ona pasia e le Malo. Ua tutumau pea le finagalo o le alii Palemia e le toe suia le taimi e faatino ai lea faamoemoe o le faigamalo.
Ua ia toe saga faapupula mai foi mafuaaga na faatino ai lea fuafuaga, ona o le a manuia ai aiga lima vaivai o loo toatele fanau i Niu Sila ma Ausetalia e mafai ona maua ai se taavale foeuli taumatau. O loo teena foi e le alii Palemia le finagalo o le taitai o le Pati a Tagata le susuga Mapusua Toleafoa Solomona To’ailoa e faapea o le suiga ua fuafua e le Malo, o le a matua afaina ai le itu tau tupe, le tamaoaiga o tagata ma aiga, ae sili ona lamatia ai le soifua saogalemu o le atunuu feoai, i ni soifua o le a maumau. Faaalia e Tuilaepa o i latou o loo tetee i le fuafuaga o loo maua mea ma lelei o latou tamaoaiga, ma e le o mananao e faasafua atu se manuia tau i le maua o se taavale i aiga ma tagata lima vaivai o le atunuu.
