O le 2003, na tofia ai e avea ma Pule Sili i i le itumalo i Aukilani i Saute. O le tofia ai i lea tulaga maualauga, ina ua mae‘a o ia pulea le aai i Otara, mai le 70 i le 90 tagata faigaluega. E lē gata i lea, ae sa avea foi ma tamaitai pule o le lālā i Manurewa. O le umia o le tofiga Regional Manager, o le faatumauina lava lea o le galuega sa feagai ai, o le fafauina ma le tuufaatasia o polokalame ina ia aga‘i tonu mo le penefiti ai o tagata Pasefika i le tulaga o galuega ma a‘oa‘oga, mo le faamoemoe lava ina ia faaitiitia le numera o tagata lē faigaluega i totonu o le aai ma le atunuu.
Toe laasia le isi tulaga maualauga i totonu lava o le matagaluega
O le 2005, na toe siitia ai ma faamanuiaina i le tofiga faatonusili (Regional Director), ua lē na o Aukilani foi i Saute, ae o le tuufaatasiga o Aukilani atoa. O lona tofiga lea e oo mai lava i le atimi nei, o loo galue ai pea i le matagaluega a le Social Development.
O le matagaluega sa fesuisuiai ona igoa mai le taimi sa uluai faigaluega ai Losalina, a o le auga lava ma le faamoemoe e tasi, sa lē aveesea mai ai i taiala sa faataoto mai i le amataga.
O le vaaiga lautele e pei ona ta‘ita‘i ai nei ma avea ai Losalina ma faatonusili, e amata mai i Warkworth e oo atu i Meremere. E tusa ma le 35 lālā poo auaunaga a le matagluega o le Social Development, ae silia ma le 1000 tagata faigaluega o loo vaaia ma pulea e le tamaitai Samoa o Losalina McAlpine. E faitau miliona tala foi ni vaega tupe o loo faasoasoa ma faatatau aga‘i i ai polokalame a le faatonusili i tausaga taitasi.
Galuega faaiptoa o loo galue ai Losalina i le matagaluega
• Galuega faufautua mo le tuufaatasia o maliliega ma fuafuaga faaagaga a le matagluega.
• Tuufaatasia o polokalame eseese mo le toe a‘oa‘oina o tagata Pasefika, ma soo se tasi.
• Tuufaatasia o polokalame e sailia ai avanoa faigaluega mo tagata Pasefika ma isi.
• Tuufaatasia o polokalame e faatosina ai tagata ina ia fiafia e galulue, nai lo le faamoemoe i le penefiti mai le malo.
• Sailia o avanoa e fai paaga ai ma kamupani tetele, ina ia mafai ona ofoina ane galuega mo tagata lautele.
• Faamautu avanoa mo auaunaga talafeagai e faalautele agai i ai le malamalama o tagata Pasefika ma isi.
• Atinaeina o avanoa mo tagata lautele e fesoasoani ai mo agavaa ma silafia, e faaaogā ai taleni ma meaalofa.
Agavaa/Faailoga ma Matatia
• Fesootaiga faalauaitele – Public Relations – Ausetalia
• Matagaluega a le Palemia – Samoa
• Atinae ma Polokiki – Political Economics – Saina
• Tipiloma i Pisinisi – Diploma in Business – Niu Sila
• Tipiloma i Pulega ma Faauluuluga – Diploma in Management – Niu Sila
• Masters Degree in Public Mangement – Niu Sila
• Pule Sili – Regional Operation Manager – Niu Sila
• Faatonusili – Rigional Director – Niu Sila
O loo faigaluega faataimi atoa ma a‘oga i le suesueina ma le sailia o agavaa ma faailoga e pei ona silasila i ai. Atoa ai ma le avea o se tamaitai Samoa, ae o se Pasefika muamua ua lē gata i le pulea o se vaega tele o le matagaluega, ae ua avea foi ma Faatonusili i le matagluega lava a le Social Development i Aukilani.
