Suia le galuega
E lei umi ona galue i le fale moega e pei ona ta‘ua, ae maua loa le avanoa e galue ai i le matagaluega a le Social Welfare. Sa amata i le galue ai o se tamaitai e faamatalina faamaumauga ma auaunaga mo tagata lautele, aemaise ai o le faapepaina o galuega masani. O le taimi foi lea sa aga‘i ai le mafaufau i isi avanoa sa maua ane, i le nusipepa faaitumalo a le Auckland Star faapea ai ma le malosi faaleoleo (police force).
E ui lava i isi avanoa sa tau mafuli i ai le manao, peitai sa toe faatumauina lava le fia auauna pea i le matagaluega sa muai ofoina ane le galuega. O le isi tulaga sa manumalo pea i le finagalo o Losalina, ona o le silasila ma vaai alofa i le manaomia tele e tagata Samoa ma tagata Pasefika, o le ituaiga tagata ma le auaunaga sa ia faatinoina. Sa mauaa le manatu, o le a nofo pea ma tautua tagata lautele i lana galuega sa iai, ona e tāua tele ma sa ia mautinoa foi o le auala lea e oo ai lana fesoasoani mo isi tagata.
E talitonu Losalina, o le faauaua pea o le soifua a‘oa‘oina, o le laasia foi lea i le isi sitepu aga‘i i le faaeaina i totonu o galuega. O le ala lea sa toe foi ai e saili faailoga e pei ona ta‘ua i le taimi o lona soifua aoaoina i Niu Sila, e pei ona faapaleina ai i le Master Degree in Management, Diploma in Business Mangerment, Diploma in Studies.
Siitia le tulaga i totonu o le matagluega
E fai si televave tele ona siitia le tulaga o Losalina i totonu lava o le matagluega. O galuega faatino ma se tasi o polokalame sa fafauina ma tuufaatasia e Losalina, o se tasi lea o ki na mafua ai ona siitia ma tofia e le matagluega i se tulaga maualuga a‘e, nai lo le tiute ma le tulaga sa iai lona tagata. O le saunia o polokalame ma fuafuaga e faamalosia ai tagata Pasefika mo le sailia o galuega, sa matuā aogā tele ma vaaia ai le faaitiitia o le fuaninuera o tagata lē faigaluega, o tulaga uma ia sa faapitoa i ai agavaa ma tomai o Losalina.
O se tasi o polokalame logologoā ma le tāua tele ua faaigoaina o le Pacific Waves, o le isi auupega malosi tele lea sa vaai maualuga ai le matagaluega i le tamaitai Samoa. A o le manatu o le auauna, e fia tulituliloa pea isi avanoa mo le aga‘i i luga i se isi foi tulaga aloaia, sa lē gata ai le taumafai, ae toe saili pea ma tu‘itu‘i pea le faitotoa mo se isi laasaga.
