E toe faatalofa atu i le mamalu o le aufaitau, aemaise lava o le tatou itulau masani i vaiaso taitasi. E iai le talitonuga sa aumanū lena vaiaso ua tuanai atu i galuega ma lavasiga sa feagai ai, i le faatasi mai o loo tatou Matai i le Lagi. O le tatalo masani a le tatou polokalame, ia talosia ia aveaveai lea manuia mo laasaga ma faamoemoega o lenei foi vaiaso ua savalia. Faamalo atu ai le folau, o le vaiaso na tea nei sa feagai ai ma le faamanatuina o le tutoatasi o le atunuu i Samoa ma Niu Sila.
Losalina McAlpine
O le vaiaso nei, o le a faaauau ai le vaega lona lua ma o le vaega mulimuli foi lea o faamatalaga e uiga ia Losalina McAlpine, o le tamaitai faatonusili o Aukilani atoa o le Matagaluega o Atinae ma Alagaoa a Niu Sila (Social Development ).
O a‘oa‘oga sa feagai ma Losalina i Niu Sila, o sailiga malo sa faataunuuina a o feagai ai pea ma le galuega i totonu o le matagaluega. Atonu o se tasi lea o tulaga ese, ma e faagalogata foi i le soifuaga, ona sa faatumauina pea lona tulaga galue, ae sa sailia ai foi ma faailoga i le vaitaimi e tasi. Ua mautu atu le amataga ma le soifua a‘oa‘oina, ae sa taaofai atu ai ma le taimi sa toe a‘oa‘oina ai i faailoga e pei ona ta‘ua, lea ua manatu ai e toe faamanino atu a o lei amata lau faitau mo le vaega mulimuli.
Soifua galue/Galuega
Samoa
Sa galue i le Matagaluega a le Palemia i galuega mo fesootaiga ma tagata lautele. E lē gata i lea, ae sa ia tauaveina foi galuega mo le nusipepa a le malo le Savali, i le gagana Peretania, a o taiulu i le afioga ia Tunumafono Aiavao i totonu lava o le ofisa o le Palemia i Samoa.
Niu Sila
E pei ona ta‘ua i le vaiaso talu ai, o le tausaga e 1985 na taunuu ai i Niu Sila mo le taimi muamua, ma amata ai ona saili se galuega e fesoasoani i le aiga, aemaise o le mafuaaga na mafua ai ona tuua le atunuu, ae malaga mai i Niu Sila. Sa amata galue ina ua maua le galuega i se tasi o fale faimeafale. Na ta‘ua e Losalina, e toatele nisi o uo atoa ma lona aiga sa fesiligia lona tagata, pe aisea ua galue ai i lea ituaiga galuega ona o le manatu ma faatusatusa i le tomai ma galuega sa galue ai i Samoa a o lei malaga i Niu Sila.
E lei afaina tele i le manatu o Losalina lea tulaga, ona sa iai lava lona talitonuga, o Niu Sila e tusa lava poo le ā le galuega e maua, o le mea sili o le faaaogā o le avanoa ua maua e amata ai se isi laasaga fou mo le lumanai.
O le isi tulaga sa ia ta‘ua, ona o lona malaga mai i Niu Sila o se avanoa sa maua i lalo o faiga faapaaga a Niu Sila ma Samoa. O le isi lea aiaiga o faiga faapea, e tatau lava ona galue i le galuega sa ofoina le pepa faigaluega na mafua ai ona talia le atoatoa o le talosaga, aemaise ai o le auala laupapa lea e agai ai mo le nofo tumau i totonu o le atunuu.
Sa galue foi faavaitaimi i le faleaiga o McDonald, i le manatu ma le agaga o le Samoa mai Samoa, e naunau i le faaaogāina o avanoa e maua i galuega e faatino ai le malosi ma e lē manao e mālōlō. E lē gata foi i lea ae lē manao foi e taga tasi se mea e fai, o lona lea talitonuga sa soifua a‘e ma ia, ma sa a‘oa‘oina ai foi e mātua i totonu o le aiga.
O le soifua lē fālōlō, ma le lē faalogologo tiga o nisi ia o manatu sa lē mafai ona aveesea mai le finagalo o Losalina. Sa ia ta‘ua foi le tulaga tāua tele, o le fai o faaiuga e faavae i le ituaiga tagata o loo iai ia lava.
