O le tausaga e 1996 na taulimaina ai le faailoga Tipiloma i le tulaga tau pisinisi (NZ Diploma in Business Studies, and a Diploma in Business Management).
O le taulimaina o ia faailoga sa matuā fesoasoani tele mo le siitia i luga o lona tulaga i totonu o le matagaluega o alagoa ma atinae a le malo o Niu Sila. Na ta‘ua foi e Losalina, o a‘oa‘oga lava mea uma i lona silafia aemaise lava totonu o galuega.
O le faaaogāina o avanoa e maua o le isi lea a‘oa‘oga tāua, ma e ao lava i soo se tasi ona taofimau avanoa tāua pe a maua.
E lei gata ai le taumafai o Losalina; na ia ta‘ua sa iai pea le avanoa i le apefai e tatau ona ā‘ea ma sa faananau pea i ai lona loto ina ia mafai ona ia ausia.
O le isi laasaga agai i luga, o le a mafai ona ia mauaina pe afai o le a siitia foi se isi a‘oa‘oga e toe faataunuuina. O le ala lea na iu ai ina toe agai i le Victoria University i Ueligitone, mo le sailia o se isi faailoga i luga atu, mo le faataunuuina o le miti.
O le tausaga e 2007 na faaiu ai le taumafai i le Victoria University, ma faauuina ai i le faailoga o le Master mo le puleaina o galuega tetele faalauaitele (Master Degree in Public Management).
O le feagai ai ma le toe a‘oa‘oina ma le sailia o faailoga i Niu Sila e pei ona faailoa i luga, sa faia lava ma faatino i ia a‘oa‘oga, a o tumau pea o se tagata faigaluega tumau i totonu o le matagaluega a le Work and Income.
O le vaiaso fou o le a faamae‘a atu ai le vaega mulimuli o le soifuaga o Losalina, i le tulaga o galuega seia oo lava ina avea o se tasi o faatonusili o le matagaluega a le Social Development o loo iai le Work and Income, i Aukilani atoa.
