Ona o Losalina e iai lona piitaga i lea atunuu, o le mafuaaga lea sa naunau ai e saili se isi auala o fesootaiga ma Saina, ina ia mafai ona malamalama foi i le isi ona itu malosi i lea foi atunuu.
A o iai Losalina i a‘oa‘oga mo tausaga e lua i Ausetalia, e taliu lava i le atunuu mo malologa ma sa faaaogāina le Ofisa o le Palemia e galue ai, ma faataitai ai agavaa ma le poto sa a‘oa‘oina ai i lea lava vaitaimi.
O le nusipepa o le Savali i le gagana Peretania, sa faaautu i ai ma galue ai, ma toe foi i Ausetalia pe a toe amata a‘oa‘oga i kuata taitasi.
E pei ona ta‘ua e le‘i mae‘a le taimi sa faatulagaina mo le faamoemoe i Ausetalia, ae toe suia agai i Saina. O le ofoina mai e Saina o ia avanoa i lena vaitau, o le taimi muamua foi lea ua tatala ai le faitotoa o Saina mo le auina atu o tamafanau a Samoa mo a‘oa‘oga faasikolasipi.
O mataupu i fesootaiga ma tagata lautele ma le tulaga o atinae ma polokiki sa faapitoa i ai a‘oa‘oga sa ofo mai e Saina.
E lua tausaga sa a‘oa‘oina ai i Saina i mataupu e pei ona ta‘ua, ae o le tulaga ese o lea faamoemoe, ona sa faia uma lava a‘oa‘oga i le gagana a Saina. Sa ta‘ua e Losalina o le tausaga muamua, sa faapitoa lava mo le a‘oa‘oina ma le malamalama i le gagana a le atunuu, a o le‘i amataina a‘oa‘oga mo mataupu.
O le alafua lava lea sa faailoa ane, a o lei malaga atu i lea atunuu. O le uluai Samoa foi lea sa auina atu i Saina mo a‘oa‘oga faasikolasipi, mo se taimi muamua sa ofoina mai ai e lea atunuu ia avanoa.
A‘oa‘oga i Niu Sila
Na uluai taunuu i Niu Sila i le tausaga e 1985, ona o se faamoemoe e fesoasoani i le aiga. Peitai na avea ma auala e toe ulufale ai i nisi o a‘oa‘oga mo le faamoemoe e siitia ai le tulaga o le galuega sa galue ai talu ona taunuu i Niu Sila.
O le silasila ma le vaai i avanoa mo le agai i luga ma le siitia o le tulaga i le galuega, o le auala lea na faamalosia ai le toe sailiili atili ma taumafai mo le toe a‘oa‘oina ina ia faafeiloaia ai manaoga o le galuega, aemaise o lona lava lumanai manuia.
