E talanoa loa i lea foi itupa ma o latou uiga, e tatau lava ona mautinoa e maua ai le ‘ata ma le ita. O le uiga o le fasi laina mulimuli ona e iai lava le vaega e faalēmasani i uiga o faafāfine, peitai aua ne‘i galo e lē tutusa uma le auvaega.
O le aumalaga a le Divas o loo faagasolo a latou koneseti ma faafiafiaga i Brisbane ma Sini, o se vaega e faigaluega lelei uma i Samoa, peitai ua tuua lava o latou tiute ae malaga mai, ona o nisi o a latou fuafuaga saili seleni, auā nisi o galuega alofa o loo latou faia e pei o le alo atu e faatau meaalofa mo nai tamaiti o loo i totonu o le maota gasegase i Motootua ma nisi o fesoasoani mo Monike.
O loo taitai mai le aumalaga e le faletua ia Tuiloma Sonnya Sanft-Ah Tune, faatasi ma i latou e toalima, o Josie Hunter, Blondie Ropati, Resitara Apu, ma Tara Pumare.
Ua mae‘a a latou faafiafiaga e 2 i Brisbane, ae o le vaiaso nei ua alo atu e faafiafia i Sini i le aso 11 o Novema i le Glenquarie Tavern ma le aso 12 i Green Acre, e amata i le 9pm i le afiafi seia pa‘ia le vaveao.
O le a toe taliu mai ma faafiafia i Brisbane i le aso 19 o Novema ma o le a auina atu ai se aofai atoa o la latou faigamala i se seleni o le a tauaaoina.
O se agaga fiafia i lenei foi itupa ona o le tele o ni galuega lelei o loo latou faia. E faaalu o latou taimi e faafiafia ai ma maua seleni, ina ia foai atu i ē o fia maua le fesoasoani poo le manaomia.
O le susuga ia Tuiloma Tanu ma le faletua ia Pouli Sanft o loo faamautu ai i Kuiniselani
