O le osofaiga a leoleo i se pisinisi i Vaitele i le Aso Toonai 8 o Aukuso 2009 na maua ai maruana ma ua faaalia e leoleo o loo taofia ai nei se tasi sa tuli sona faasalaga soloatoa i le fasioti tagata faamoemoeina, mai le nuu o Faleatiu o Tagaloa Filipaina.
O loo musu le sooupu o le matagaluega o leoleo le susuga Papalii Li‘o Ta‘eu Masipa‘u e faalauaitele mai faamatalaga uma o le osofaiga i lana faamatalaga o loo faaauau pea ia osofaiga i nisi o nofoaga e le mafai ona faailoa mai.
O Tagaloa Filipaina sa falepuipui i le fasiotia o se tasi o alii leoleo i tausaga ua mavae e mafua i se solaaga a pagota mai le falepuipui.
Le solaaga lea na toe faaopoopo ai ma le taimi sa nofosala ai o ia i le falepuipui. Ua leva ona masalomia lea tagata e leoleo i le faia o gaioiga e aafia ai laau faasaina, peitai o le faatoa faatino ai lea o se osofaiga i se fasi fanua i Vaitele o loo ia lisiina mo le faia ai o sana pisinisi o le gaosia o le piliki ma faatau atu.
E le o faailoaina mai e leoleo poo taofia ai foi ma le toalua o Tagaloa ma ni tamaiti e i le va o le 13 ma le 15 tausaga na pueina i le taimi o le osofaiga.
E le o mafai ona maua se faamatalaga manino o le osofaiga mai le sooupu o le matagaluega o leoleo le Komesina lagolago le susuga Papalii, peitai ua faaalia e se molimau o le ulugalii o loo taofia e leoleo mo suesuega ua leva ona masalomia i le totoina ma le faatau atu o maruana.
E iai se isi osofaiga a leoleo i le lua vaiaso talu ai na agai foi i se pisinisi lea na maua ai foi laau faasaina, peitai e oo mai i le taimi nei ua fiu e fesiligia le sooupu o leoleo i lea osofaiga e leai se faamatalaga ua tuuina mai i le au faasalalau.
O le amataga o le tausaga e 2006 na faatino ai foi ni osofaiga faapea a leoleo lea na maua ai nisi o latou gaosia ma faatau le aisa ma le cocaine.
O loo falepuipui ai nei mo le 14 tausaga se tasi ua faamaonia ona moliaga o Joe Palagi.
E tuaoi le lotoa sa faia ai le pisinisi a Joe Palagi i Vaitele lea na maua i ai le pauta faasaina o le aisa ma le cocaine, ma le lotoa a Tagaloa Filipaina.
E lei osofaia la i le taimi lea lana lotoa ae o le tausaga nei 2009 ua faatino ai suesuega i le nofoaga o iai le pisinisi piliki a Tagaloa Filipaina.
E toatele nisi na maua e leoleo o loo tulei solo pe faatau atu maruana i vaega eseese o le taulaga aemaise o le Maketi i Fugalei ma le maketi i Savalalo, ma o le talitonuga o leoleo e iai tagata o loo faafaileleina ma toto le laau faasaina ona ave lea faatau e isi tagata.
O se lipoti i se tasi o nusipepa ua taua ai o le fanua o Tagaloa Filipaina i Faleatiu e le mafai ona tu i ai se tagata sei vagana ua tapa muamua se faatagaga a lē e ana le fanua.
