Sue tupe John Key ma lana faigamalo, tauala i le Matagaluega o Leoleo ma Taavale afi
O se faiga na matua le faaalia ai le loto tiga, ita ma le lē fiafia o le toatele faasaga i le Matagaluega o Leoleo, ona o le latou gaioiga sa faia i se tasi o fetaulaigaala i Manukau Aiukilani i Saute.
O le poloka a Leoleo sa siaki ai sala tupe o taavale o lo aitalafu ai pe lei totogi foi mai taimi ua tuanai.
O se gaioiga sa aufaatasi ai ma le Matagaluega o Tavaleafi ma Felauaiga i le Laueleele, ma faataunuuina ai le taofia faamalosi o taavale, sei ma le ki ae faasavali le avetaavale, pe afai o iai pea ni sala tupe e lei totogia a le taavale sa taofia i lea aso.
Sa faaigoaina e nisi lea gaioiga a leoleo, o se galuega ma se faiga faatupu vevesi, poo ua soona fai e aunoa ma se logoina o tagata lautele e pei o nisi gaioiga masani ua leva ma ua nofouta iai le toatele.
O se faiga taufaapopo, ma sa oo lava ina fesiligia nisi i o latou manatu, ma e lei iai se tasi na fiafia pe na lagolagoina lea faiga a leoleo, ona ua fai lava si faaletonu ma ua manatu nisi ua soona fai tele.
Fai mai nisi, pe aisea lava ua soona tulituliaupu ai sala o taavale, ae afeafe ma afe le anoano o solitulafono mamafa e pei ole gaoi, talepe fale ma le fasi tagata, e le o mafai ona o faamalosi iai, ma loka pe faatino i iai o latou tiute.
Fai mai foi e le o lava leoleo e faatainoina itute ma galuega i aso uma, ae ua matua toatele le anoano o ia leoleo sa faatinoina le poloka, ma loka fua taavale a tagata o loo feoai i feau ma galuega aoga.
E fai lava si toatele o i latou sa aafia i lea poloka, ma sa tapa lava tupe o sala i lea lava taimi, pe a faamaonia o loo iai ni sala tupe e lei totogia.
Afai e le mafai ona totogi tupe i le taimi lava lena, e taofi ai lava ma le taavale a eave le ki, seiloga ua maea ona faamama ma totogi le sala tupe.
Ua faailoga fesili foi i nisi, pe aisea foi ua soona fai ai poloka faapea i aukilani i Saute, ae aunoa ma isi veaga o le aai i aukilani.
Ae faapea mai leoleo, ona o le maualuga pea o fuainumera faamaumauina o sala ma solitulafono a tagata aukilani i sauté, o le mafuaga lea.
O loo iai pea lava taiala ma le faagasoloina o galuega a leoleo ma le Matagaluega o Faamasinoga agai i taavale ma tagata ua le totogia sala tupe.
O sitepu o loo faatulagaina o le aoao malie pea, a le mafai ona ave lea i le Faamasinoga, ona poloaina lea e sei faamalosi meatotino.
Peitai e foliga mai i lea gaioiga a leoleo, o se faiga ua manaomia vave tele se tupe mo se taimi puupuu.
O le ata manino lea o le mativa o le malo, ma le leai o ni tupe e faatino ai ana fuafuaga sa muai folafolaina atu i tagata o le atunuu.
O lea ua toe tapa i se auala fai faamalosi mai tagata lautele, ina ia sue atu ai ni tupe.
Aisea ua le taofiofi ma tumau pea i taiala ua maea ona faataoto? Onosai ma fai pea tiute masani.
E foliga mai e iai foi nisi e le o faatinoina a latou galuega, ina ia aoga ma gaioi galuega faagasolo, ao lea ua soona fai atu ai ma tagata lautele.
Ua atili inosia ai fua ma leoleo ma le latou galuega, ae ona o le faatonuga faipito tasi a se tasi, ma se vaega o ni tagata o loo pito i luga, talu ai le nofonofo e le faia o latou tiute ma galuega.
Ae faaaoga le malosi poo le paoa faale-Taitai e faatonutonu ai galuega fai.
O le tasi lea o taaviliga ua feagai nei ma le lalolagi i soo se vaega lava, o le faaaoga o le malosi faa-Taitai e faia ai se mea.
