Ua silia ma le lua masina talu ona taofia e leoleo se tasi o faafeagaiga o se ekalesia i Aukilani i Saute, ina ua lipotia ma tuuaia i lona faia o ni amio matagā, e aofia ai ni faiga aiga faamalosi i teineti e i lalo ifo o le tai sefululima tausaga le matutua.
O teineti sa aafia ma faasoloatoa ai faiga faa-Sotoma a le faifeau, e faapea o se vaega o tamaiti sa vaetamaina pe faatea mai faaletulafono e lenei faifeau ma lona faletua mai Samoa, ma sa nonofo uma ai i lo la fale mai tausaga ua mavae.
O nisi o nei tamaiti e aiga ia i laua ma lona faletua, a o nisi lava foi e le aiga, a o ni uo sa masani ai i le atunuu, lea na mafua ai ona maua lea fesootaiga. Na faigofie i matua e ana fanau ona faamatuu mai nei tamaiti, ona o le talitonuga ma le faatuatuaga, e faapea o le faafeagaiga ma lona faletua, e malu ai fanau e pei ona talitonu i ai le tele o aiga Samoa.
O se lipoti mai nisi o molimau sa latou logo mai le mea na tupu, na taua ai e faapea, o le faletua lava o le susuga i le feagaiga e masani ona malaga i Samoa mo le vaetamaina mai o tamaiti.
Ua fai si leva o tausaga sa faataunuuina ai lea faiga, ma ua silia i le toasefulu, agai atu i le luasefulu i latou sa aumaia i lalo o lea polokalame a le faletua.
Sa faamatalaina o nisi lava taimi e tai lua vaiaso ma malaga le faletua i Samoa mo lea lava faamoemoe, mulimuli ane sa oo ina avea le malaga soo o le faletua i Samoa, ma auala na maua ai e le faifeau, o loo fai se faiga faapouliuli a lona toalua ma se isi tagata i Samoa.
E manatu le ulugalii lea sa molimauina ia faiga, atonu o le isi lea mafuaaga ua agai ai loa le faifeau ma totoo i fanau teine sa mau i lalo o lana faamalumaluga.
O se talanoaga ma molimau maumaututu, o lenei lava mataupu, o nisi foi o aiga sa aafia ai a latou fanau i faiga matagā ma le lē alofa a lea faifeau, na faaalia ai le faanoanoa tele, ma le maofa i nei ituaiga faiga. E le gata i lea ae sa faaalia foi lo latou fia tauimasui e tali atu ai i le faifeau ma sauaga na ia fai. O se tasi o tamā e aiga lelei ma le faafeagaiga, sa ia lafoina foi se faamatalaga matuia e lē fia taua, e faaoo i le faifeau pe afai ae maua sona avanoa e toe feiloai ai ia te ia. O le taimi nei o loo ua faamaonia mai e le ofisa o leoleo i Manukau, o loo suesueina nei lea mataupu, ma ua taumafai e tuufaatasia faamatalaga uma ma faamaumauga e uiga i le tulai o le faafitauli.
Ua faamaonia mai e leoleo le iai lea o se taofiga, poo se sa, ua le tatau ai ona faailoaina soo se suafa o i latou uma o loo aafia i le mea sa tupu, i tusitusiga ma faasalalauga.
Totonu o le lotoa o le faifeau
O le nofoaga o le faafeagaiga e faapea se faamatalaga a molimau sa tuuina mai, e fa potu moe o le fale, atoa ai ma le fale taavale (double garage). O le fale o le faifeau, e nonofo ai foi ma lana fanau ma o latou taitoalua, faatasi ai ma le anoano o tamaiti sa vaetama ai mai le atunuu.
O le tele o taimi e faaaoga ai foi taavale e momoe ai tamaiti, ona o le utiuti o avanoa o faaaogaina.
E talitonu molimau, o le isi foi lea mafuaaga o le faigofie tele e le susuga i le faifeau ona fai ana gaioiga faatiapolo, ona o le fesuluai solo o tamaiti e saili se avnoa e malolo lelei ai mo taimi e manaomia ai se moe.
O nisi o taimi ua faapea lava foi ona taumafa ai ma le ava malosi, ma sa taua foi o nisi na o mafuaaga le lelei sa mafua ai ona fai lea tulaga, ma amata ai foi faiga fesoliai ma le lē taupulea.
Sa tautino lava foi e le molimau lenei, e na te faatusaina le fale o le faifeau, o le nofoaga o le tiapolo.
E le faapea ona o le tiga tele ua mafua ai ona fai lea faamatalaga, peitai o le tala faamaoni lava.
O loo tau saili pea se avnoa o le tatou nusipepa e talanoa ai ma fesootai atu i le faletua o le faafeagaiga, peitai ua suia le numera o le telefoni sa iai muamua, e le gata i lea o loo taumafai lava foi ina ia fesootai pea ma leoleo, ina ia fesoasoani mai foi mo nisi o a tatou lipoti, aemaise ai o se mataupu maaleale tele, e tatau ai foi ona o faatasi ma le tulaga ua oo i ai suesuega a leoleo i lenei taimi, mo le faamatuuina mai o soo se faamatalaga mo le silafia e tagata lautele.
O le aliae o lenei mataupu, sa taua foi e molimau, atonu o se taimi lava lea mai le Atua e faailoa ai le agasala ua matua ma ua lē matineia.
O loo tālia nei poo afea tonu se taimi ma se aso o le a valaau ai lea mataupu i luma o le Faamasinoga mo sona suesuega ma se iloiloga, a o iai pea le faifeau i lalo o le taofiga ma le vaavaaiga a leoleo.
O faamatalaga sa lipotia na auaufaatasi lava i ai ma ua malilie foi i ai aiga o se tasi o tamaitai sa aafia, atoa ai foi ma se isi ulugalii e malamalama lelei lava ma ioeina le faamatalaga sa tuuina mai mo lenei lomiga.
Ua maea foi ona fai i ai sailiiliga a le Samoa Times, ma ua maua ai foi ma nisi o vaega o le a matua tulitulimatai nei mo se faamaoniga, i le auala sa faaaogaina mo le liliuina mai o le toatele o nei tamaiti mai Samoa.
Ua taulimaina foi e le tatou nusipepa ni faamatalaga mai se tasi o tamaitai sa aafia i sauaga matagā fai faamalosi, aemaise ai se faamatalga mai se tasi o tamaititi o le tausoga o le tamaitai na aafia, o se tasi foi lea o molimau maumaututu o lenei lava mataupu, ma o loo iai uma i laua i lalo o le puipuiga a leoleo.
O le mataupu e uiga i le liliuina mai o tamaiti nei mai Samoa, o le tasi lea o vaega o le a e faitau i ai i se taimi o muamua, e uiga i faiga sa faataunuuina ai galuega mai le atunuu.
O le faamatalaga sa tuusao mai lava i le tasi o tama talavou, sa ia mautinoa lelei se faiga solitulafono sa fai ia te ia, a o lei agai mai i totonu o lenei atunuu i tausaga ua mavae.
O nei faamatalaga uma ua taulimaina uma e le tatou nusipepa. Ua iai foi ma le faamoemoe o le a faagasolo pea tusitusiga ma lipoti mai ia i latou uma sa aafia, pe a tusa ai ma auala uma ma sailiiliga o loo faagasolo i lenei taimi.
E faaauau pea lenei tusitusiga mo le lumanai, seia oo ina taunuu i se faaiuga o le a iai lenei foi mataupu.
