O le alii o Fou Sekone

Ua faasala i le falepuipui le isi alii e toatolu i ai alii ia na o latou aveese faagaoi pusa panadol poo fualaau o mea tiga mai i le fale o loo teu ai pusa panadols a le falema’i. O le alii o Fou Sekone, na’o ia lea na tetee i moliaga, ae o isi alii e toalua na o la ioeina o la moliaga o le gaoi a’o avea ma tagata faigaluega.
O le gaoiga lea na faia na masalomia ai le mafuaaga e ala ai ona gaoi pusa panadol ia, e gaosi ai le aisa. Ma o le isi alii e igoa ia Pio Fesolai o loo taofia nei i Tanumalala na masalomia o ia le taitai o se vaega e gaosia ma unaia le aisa.
Peitai na vave ona ioe Pio ma le isi alii o Amanono i moliaga, se’i vagana ai Fou Sekone. O le finauga a Fou ona o ia faatoa alu atu i le taimi mulimuli, ae o le isi aualii ua leva ona la faia le gaioiga faasolitulafono.
O se faamatalaga e lei taliaina e le faamasino, ina ua suesue le mataupu a Fou. E lei lava foi ni mau e faamalieina ai le faamasino o Mata Tuatagaloa, e lagolagoina ai le finau a Fou e faamaonia e sa’o lava o ia na tosina i taa’iga a le isi vaega.
O le vaiaso na tea nei lea faato’ā lau ai le faasalaga o Fou. Ma na talosagaina e le loia a Fou, le susuga ia Komisi Koria se faamāmā avega mo lana client, ona faato’ā fai lona aiga, o se alii e taulamua i le faamaopoopoina o le autalavou a le ekalesia, atoa ai ma meafai a le nuu. O se alii foi e faamoemoeina e le latou aiga, aemaise lona afafine faato’ā 3 masina le matua, o loo faamoemoe ia te ia le vaaiga o si afafine.
Peitai na fesiligia e Mata, afai o le moliaga lava lea e tasi o loo molia ma ioeina e Pio ma Amanono, o lona uiga e lē ‘aloese la le faamasinoga mai i se faasalaga faafalepuipui e ave i ai, ae e ao ona ta’u atu e le loia se mafuaaga tatau e ala ai ona lē faafalepuipui.
Saunoa le faamasino, e lē gata ina tutusa moliaga o loo molia uma ai, ae tutusa lelei foi le aofaiga o pusa panadols na o latou aveeeseina. O Fou Sekone, e 10 pusa panadols lapopoa na ia aveese, a faatupeina e silia i le 10 afe tala lona tau aofai.
Ua avatu foi le fautuaga mai i le loia a le itu a leoleo e tatau ona 3 tausaga e amata ai le faasalaga faafalepuipui. E leai nisi mafuaaga tatau, e ese mai i lipoti a faifeau ma le sui o le ofisa o le National Health Services na avatu e faaono sui ai le faasalaga faafalepuipui.
Peitai na saunoa Mata, e 3 tausaga na avatu e le loia a leoleo, aveese le tausaga ma le ‘afa, toe aveese lea o le isi 6 masina ona totoe ai lea o le 18 masina, poo le tausaga ma le ‘afa e tuli i Tanumalala.
Ae ua faaalia e le faamasinoga, o loo faaauau pea le aofai o tagata e molia atu i le solitulafono lava lea e tasi.