I luga o upega tafailagi i lenei foi taimi o loo salalau ai le tala i se tamaitai talavou mai Samoa na malaga ma le fuafuaga e fia aoga faataupousa, i le nofoaga o le Ekalesia Katoliko i Uosigitone DC i Amerika, ua taofia nei e leoleo ma molia i le Faamasinoga Faaitumalo i Columbia i Amerika, i moliaga o lona fasiotia o lana pepe faato‘ā fanau mai.
Ta‘ua i lipoti o lenei faalavelave i luga o upega tafailagi, e lima aso talu ona taunuu le tamaitai Samoa o Sosefina Amoa, 26 tausaga le matua, i le nofoaga sa fuafua e nofo ai ma faagasolo ana aoaoga, ae tulai mai ai loa le faalavelave, ina ua faafuasei ona fanau mai lana pepe e 6pauna ma le 2aunese, i le aso 10 o Oketopa i totonu lava o lona potumoe. O se pepe tama ma na ia faaigoa o Baby Joseph.
E tusa ai ma se faamatalaga a Sosefina i leoleo ina ua suesueina le mataupu, sa fanau mai lava lana pepe o ola, ae o lona fefe ina ne‘i tagi le pepe ma lagona mai e isi taupousa, ma iloa ai e lei tautala sa‘o ina ua muai suesueina o ia i lea foi itu o le soifuaga tau faiaiga, na ia avane ai se ie mamoe ma pupuni ai le gutu ma le isu o si ‘alu‘alutoto seia oo lava ina mole ma uma ai lona ola.
Na tau pepelo muamua Sosefina i se tasi tamaitai taupousa ina ua iloa, e faapea o se pepe na ia mauaina, peitai mulimuli ane na ia toe ta‘utino o ia lava na fanauina le pepe. Ona la fafao ai lea o le ‘alu‘alutoto i se tamai atopau ma avatu i le falemai. Ua molia nei Sosefina Amoa i le fasioti tagata tulaga muamua (first-degree murder), ae lei fia faia se faamatalaga a le loia o loo tulai mo Sosefina i le taimi nei. I nisi o faamatalaga a lenei tamaitai i leoleo na ia ta‘ua ai e na te lei iloa o loo ma‘itaga i le taimi atoa na agai atu ai i Amerika mo lana aoaoga e oo foi i le taimi a o iai i Samoa.
O le taimi nei o loo taofia Sosefina i lalo o le vaavaaiga malu a leoleo, i popolega ina ne‘i avea le tulaga mafatia ua iai lenei tamaitai ma itu e ono faia ai se faaiuga sese e pule i lona soifua.
E lei fia faaalia se finagalo o tamaitaisa o le Ituaiga o le Mativa, le Little Sisters of the Poor o loo faagaioia le nofoaga a le Ekalesia i Mapuifagalele mo matua tausi, o inā sa galue ai Sosefina a o lei malaga i Amerika.
