Ua asia e le susuga i le fomai o le Tusi Paia, Dr Erika Puni ma le aiga le aai o Kuiniselani i lenei vaitaimi, ona o le manaomia foi e ala i le laugaina o le upu a le Atua.
O se tasi o alo Samoa o loo filofilo i faigamea a papalagi i le malo tele o Amerika, i le ofisaulu a le Ekalesia Aso Fitu o le toe Afio mai i Washington DC, ae o lea ua maliu mai e faagasolo ni sauniga faatala‘i o le Tusi Paia i le aai nei o Brisbane. E lua lava vaiaso e faagasolo ai ana sauniga faale-Tusi Paia i le itu i Matu ona taliu lea i isi setete o Ausetalia ua mae‘a ona fuafua mo isi foi sauniga. E ese le logomālie ma le ‘anoa o saunoaga a lana auauna ina ua molimauina i le Aso Toonai o le Sapati (15 o Iuni) auā o le tele o ana faamalosi e patino i totonu o aiga, ina ia maua le fealofani ma ia feāvata‘i le tina ma le tama, ma ia mautinoa ia paleni le tafatolu ae faamuamua le Atua ma tausi lelei ana oloa tāua.
Na pei o le mālie o pesega a agelu le fesuisuiai o siufofoga o le aufaipese sa fai ma vasa‘i ai polokalame a lana auauna, ua leai ai lava se isi e lue se ulu ae ua na o le sioa ma le ‘ata pe a oo foi ina fuli lana auauna e fai ni tamai komeso fai mai ai le isi toeaina o le nuu o le itumalo lava o le failauga ia Dr Erika Puni.
O le faanaunauga lava o lana auauna ia faatumauina pea le fealofaniga i totonu o aiga, ma ia faamuamua le Atua o le ‘auga lea o faigamea. Na fai sao foi le fanau ina ua mae‘a le aufaipese a Scarborough ma alo atu i le lauga ae faaiu i le taumafataga ma luluaao ai i lea aoauli i le lagi e mamā ma le soifua manuia.
E iai lava lona faamoemoe o taimi ma avanoa faaauro o loo mafai ona asia mai ai lenei vaega o le kelope, e lē tuumāmāina ia te ia auā e seāseā maua ni ona taimi ona o le pisi i le galuega i le la foi itulagi ua tofia ai o ia ma le faletua ma le nofoaalo i le galuega a le Matai.
Sa lagolago malosi susuga i faafeagaiga ia Pr Tusitina Faiumu ma le susuga ia Pr Andrew Feaveai i lea faamoemoe auā o i laua ma faletua o loo tausia ekalesia i le itu i Matu.