E le o malolo le vaega o suesuega faapitoa i totonu lava o le Matagaluega o Leoleo i le suesueina o le tele o mataupu ua tuuaia ai Malu o le Malo – o se vaega lea o le latou auaunaga o le suesue lava o i latou pe afai ua laga ni faitioga i le auaunaga faaleoleo.
O lea foi na sainilima le Komesina o Leoleo, faapea ai le Komesina o Sulufaiga (Ombudsman) ma le Afioga i le Loia Sili i le masina o Mati ina ia galulue faatasi le vaega tonu lenei o suesuega a Leoleo ina ia mafai ai ona faapea e le na o leoleo o loo faatinoa suesuega ia i latou lava ia.
O le tasi la lenei o mataupu fou ua laga nei, o se tagi ua fai e se tamaitai leoleo faasaga i se isi foi sui sinia o le Matagaluega i le tuuaiga o le toso teine. Na agai mai le mataupu lenei i le tatou ofisa ma taumafai loa e saili poo ai le sui sinia e suafa ia Filipo lea ua tuuaia.
E toatele “Filipo” i le Matagaluega o Leoleo ae e toalua lava “Filipo” o loo umia tofiga sinia o le Matagaluega o Leoleo. O le tasi la o ia alii leoleo sinia, ua faapea ona ese le vaega o le auaunaga faaleoleo ua tofia i ai.
O lea ua me‘i ane i le vaega e ta‘ua o auaunaga lautele a le Matagaluega. O Filipo lea e sailia e umia le tofiga satini i totonu o le Matagaluega.
O le mafuaaga o le see ese mai i le vaega sa iai, ona o loo suesue se tagi a se tamaitai leoleo e lei leva ona galue i le Matagaluega ua faamalosi o ia. O se tasi o le mau tuuaiga ua lagalaga i totonu o le Matagaluega ma ua aafia ai lava alii ma tamaitai leoleo, o Malu o le Malo lea o loo ave i ai le faatuatuaga o le atunuu mo le latou saogalemu.
Ua tele foi faitioga i le va lava ia o Leoleo ma o latou taitoalua ua faapea ona laga ma suesueina lava e Leoleo. O loo galulue uma lava i laua, Filipo ma le tamaitai o loo ua faia nei le tagi. O se faamatalaga lea na tali ane ai le amataga o suesuega.
O le “Filipo” foi lea na faapea ona tuuaia i le matua faaleagaina ai o se taavale a leoleo sa ia faafoeina. E lei faia lava se faaiuga i lea mataupu ae o lea ua suesue foi le alii lava lenei e tasi i le isi tagi lea ua faia e le tamaitai leoleo.
O le faamatalaga a le Komesina Lagolago o Leoleo, o le sui sooupu foi lea o le Matagaluega, le Afioga Leaupepe Fatu Pula, o lea ua amata suesuega a le Matagaluega i le talosaga lenei a le tamaitai.
“E sa‘o na faigaluega faatasi ma o lea la ua aveese lea alii mai le vaega o le Matagaluega na galulue faatasi ai ma le tamaitai leoleo ua faia le tuuaiga, ae sei tālia poo le a le iuga o le suesuega ua faia nei”.
O le taumafaiga a le Matagaluega e fufulu ese le tele o faafitauli ma solitulafono ua tulai mai ma tuuaia ai sui o le Matagaluega, e foliga o loo tuai le faagasologa ae o loo faaauau lava tuuaiga i ona sui. E lei toe iai lava se faamatalaga ua tuuina mai i suesuega o se Komesina Lagolago o le Matagaluega lea sa faapea ona tuuaia ai le maitaga o se tamaitai pagota.
Ua toe lagalaga mai foi lea mataupu i le toe oo ane o le tamaitai lea na tuuaia le aafia ai i lenei mataupu, i se faalapotopotoga i totonu o Apia mo le toe faaauau ai o lenei mataupu.
Ona pau lava le tulaga mautu o lea mataupu, o le faasala faafalepuipui ai o le tamaitai o Akalita Apelu le tausi soifua lea ua faasala faafalepuipui faalua ona o le faamaonia o lona faia o ni taotoga e faapa‘ū ai maitaga.
O le mataupu mulimuli lea ua toe tuli ai le isi sala faafalepuipui o lea tamaitai, o le mataupu tonu lava lenei ua tuuaia ai le Komesina Lagolago lea o Leoleo. O lea lava e galue lea alii i le tofi Komesina Lagolago o Leoleo.
“O le mataupu lena i le Komesina Lagolago o Leoleo o le lē lava o mau faasaga i le tagi a le tamaitai, lea na mafua ai le faataatia ese o lea mataupu,” o se faamatalaga lea a Leaupepe Fatu.
Na fesiligia le sui sooupu o le Matagaluega pe o le ā tonu lava le galuega o fai e le Matagaluega e taumafai ai e taofiofi le tele o nei ituaiga faitioga ua lagalaga pea faasaga i Leoleo ae o le tali a Leaupepe, o loo faaauau ona lapatai faatautaia faatalatalanoaga ma i latou o loo galulue o Malu o le Malo.
“E le faapea e le o faia i ai faamatalaga ma lapataiga, o le galuega lena o loo faaauau a le Pulega, o loo lapatai pea Leoleo i le faia o solitulafono, ae e le mafai ona taofia nisi o loo faatino pea nei amio.
A mae‘a foi la suesuega ua faamaonia a latou solitulafono, ona fai lava lea o le faaiuga e tatau ona fai i ai e faatea ma le galuega ma e ave foi i le faamasinoga e faaauau ai tagi nei”.
Na maua e lo tatou ofisa ua iai foi se tusi le malie a le Alii Palemia ua oo lava i le Matagaluega ona o le tulai soo mai o nei tuuaiga aemaise lava i sauaga mataga ua faia e leoleo faasaga i isi tagata ma totonu lava o le Matagaluega.
O le tusi na ta‘ua e se tasi na aumaia lea lipoti i le tatou ofisa, na fai sa‘o ai lava le taitai o le atunuu i le Pulega o le Matagaluega, e aveese tagata nei e faia nei “amio puaa” ae tuu le Matagaluega latou i tagata o loo faamaoni ma faatino lelei le auaunaga.
O loo tālia nei la poo le a tonu le faaiuga o le a faia ia “Filipo” lenei ua lua tuuaiga ua faia faasaga ia te ia ae o lea lava e galue e oo mai i le taimi nei.
