Lipoti mai le vaiaso ua tea

Ou te faamalulu atu i le mamalu o le aufaitau nusipepa faapea foi le tatou Atunuu o loo faafofoga mai vaiaso taitasi i luga o le tatou leitio, ua lē maua se avanoa mo tusitusiga ma le faatalanoaina i le leitio i le vaiaso ua tea talu ai lava tuatuagia faaleaiga. Sa ou malaga i atunuu mamao ona o se tasi o tamā matua o lenei aiga ua tuumalo i Amerika.

E ui o se aso faanoanoa, peitai ane sa maua ai foi le avanoa e toe fesootai ai ma nisi o le aiga o loo nofo salalau i le la foi itulagi. Ua malaga nei le tamā ia Tiumalumatua Faatonu Tiumalu i le atoaga o lona 71 tausaga. Ua leva ona maua o ia i ma‘i o le tino.

O le matou tatalo ia maua e lona faletua o Epenesa ma le fanau faanoanoa le lototele ma le faamafanafanaga mai le tatou Tapaau Silisiliese.

O le vaiaso ua tea ma le vaiaso fou e leai ni fonotaga a le Palemene o faia – ma e o tutusa ma malologa o aoga – seia vaganā ai fonotaga a komiti a le Palemene o loo galulue e iloilo mataupu o loo nafa ma ia komiti faalepalemene.

Mo le silafia o le tatou Atunuu, o lea ua maua nei le avanoa e fai ai talosaga tusitusia e faatatau i le Tulafono Taufaaofi mo Faaipoipoga a Ulugalii o le Tane i le Tane, poo le Fafine i le Fafine. Ua mafai e soo se tagata poo soo se faalapotopotoga ona faia se talosaga tusitusia e faasaga i lea tulafono taufaaofi.  E tapuni lea avanoa mo talosaga i le aso 26 o Oketopa.

O le ala e tatau ona uia mo talosaga i lea mataupu, e tatau ona fai muamua sau talosaga tusitusia ma tusi pe mafua aisea ona e lagolagoina, poo mafuaaga foi o lou tetee i lea tulafono taufaaofi.

E tatau ona tusi i lau talosaga tusitusia lou suafa, lou tuatusi, ma le numera o lau telefoni. E tatau ona tuusa‘o i ai pe afai e te manao e fofoga sa‘o i le komiti a le Palemene lau talosaga tusitusia. E leai se ‘stamp’ e manaomia mo le lafoina o lau talosaga tusitusia i le Palemene. Ia faatuatusi lau talosaga tusitusia i le: ‘Committee Secretariat, Government Administration Committee, Parliament Buildings, Wellington’.

O loo maua foi le avanoa e fai ai lau talosaga tusitusia e auala i le ‘internet’ poo le imeli. Ia faafesootai le ‘website’ a le Palemene www.parliament.nz. Ia manatua e tapuni lea avanoa i le Aso Faraile, aso 26 o Oketopa.

O lou avanoa lea e tuusa‘o ai i le Komiti a le Palemene lou finagalo i lea lava mataupu ma mafuaaga. E lē toe maua lava se isi avanoa faapea mo le Atunuu.

E mae‘a loa lea galuega ona faia loa lea o se lipoti a lea komiti i le Palemene ma toe faaauau loa lea o finauga a faipule i le faitauga lona lua ma lona tolu a le Palemene pe pasia lea tulafono taufaaofi pe leai.

O le isi mataupu mo lo outou silafia, ua faailoa mai ia te au ni faaletonu o loo feagai ma nisi o tatou tagata e faatatau ia latou talosaga mo le nofomau i Niu Sila ua latou totogiina ai tupe mo ni pepa faigaluega, ua mulimuli ane ua lē faamaonia.

Ou te talosagaina le tatou Atunuu o nei mataupu, e pa‘ū lava i luga ia te oe ni faaletonu e tulai mai. Afai e faavae i luga o le amio piopio se taumafaiga, e le taitai lava iu lelei. E tatau ona e sailiili muamua i tagata poo pisinisi o loo tou feagai poo sa‘o pe amiotonu foi latou gaioiga.

E mafai ona tou fesiligia le Ofisa o Femalagaiga pe faamaonia ia pisinisi poo faalapotopotoga o loo ofoina a latou auaunaga mo tagata lautele.

E tatau lava ona tapa ni lisiti ma faamaumauga e faamaonia ai tupe sa e totogiina i ia pisinisi poo faalapotopotoga. E tatau foi ia te oe ona ave sau tagi i le Ofisa o Leoleo pe afai e tulai mai ni faaletonu ma ua iai sau faaseā.

Ua tele suiga ua iai i tulafono o femalagaiga ma ua faamalosia lava e le faigamalo tulafono o femalagaiga. E tasi lava le autū o nei mataupu o le matagaluega a le malo o loo nafa ma ia mataupu, ma o le ‘Immigration New Zealand’ lea.

O nisi foi o taimi ua pa‘ū le sese i o tatou lava aiga. Ua mua ona faalogologo solo i tala mai i ma o, ae ua lē agai sa‘o i le Ofisa o Femalagaaiga o loo nafa tonu ma nei mataupu. E lelei lava le tele o fesili ia manino atili ai se mataupu i lo le mulimuli ane ua tupu se faaletonu ma toe salamō ai.

O le a usuia i le vaiaso fou ni fonotaga faapitoa a le faafaletui a le Leipa i Kalaisetete. O ia fonotaga o le a feiloai ai le faafaletui a le Leipa ma le pulega a le Malo o loo nafa mo le toe atinaeina o fale ma le aai tele o Kalaisetete lea sa faatama‘ia ona o le mafuie.

O le a maua foi le avanoa e feiloai ai ma nisi o faalapotopotoga tumaoti, ekalesia faapea ma pisinisi laiti ina ia maua atili se malamalamaaga i mea foi o loo tutupu i Kalaisetete, aemaise poo solosolo lelei fuafuaga ua faataatia nei e le Malo mo le toe atinaeina o fale ma le taulaga i le aai o Kalaiesetete.

E momoli atu le faamaisega i le aiga faanoanoa o le Susuga i le Faafeagaiga ia Kenape Faletoese, o se tasi o lupe faalele a Samoa i le Ekalesia PIC, lea ua tuumalo i le vaiaso ua tea, ma ua faamānavaina e le Atua ana galuega. E le faagaloina ia te au le ma feiloaiga ma Kenape ma lona faletua a o matou sauni mo faigapalota o le tausaga 2008.

O le faamanuiaga a le toeaina mo a‘u na ia faapea mai ai, “Ia e alofa i le Atunuu, ia e maua le loto maualalo, ma ia e faamoemoe i le Atua.” Na uma loa lana faamanuiaga lea, ma fai mai loa matou te tatalo, ma fai mai lava ma le tatalo a o matou tutū i le faitotoa o lona maota i Magele.

Faafetai Kenape mo faamanuiaga. Ia manuia lava lau malaga i le lagi. Ia maua sou nofoaga tumau i le Alofa o le Atua.