Ua amata tuli nei le faasalaga faafalepuipui o se tina ua 46 tausaga le matua mai le afioaga o Laulii ina ua faamaonia lona taumafai e faaoo le oti i se tasi o ona tausoga o se tamaitai foi.
E lima tausaga ua nofosala ai i le toese, Loine Mamaia o Laulii ma Vaiala, o se tasi sa galue o se sikulati poo se security officer.
Faaalia e leoleo ia latou tolaulauga i luma o le faamasinoga, o lē na aafia i le solitulafono sa fai le la meaai ma lona tina, ae vaaia loa le agai atu o le tina ua faasalaina ma se agaese, ma na vaaia foi e onā pe faasuaavā le tina ua faamaonia lana solitulafono.
Na taunuu Loine i le fale o lē na aafia ma ia sasau loa le ta ma faapea ona tali mai e lē na aafia ma lavea ai loa ona aao poo lima i ni manu‘a ogaoga.
I le faamatalaga a le tina na molia i leoleo ina ua faatalatalanoa i le mae‘a o le gaioiga na ia faia na ia ta‘ua ai, na alu lava e fai le faalavelave ma lona faamoemoe ia maua le ao o lē na aafia i le agaese ae peitai ua vave ona tali mai i ona lima.
O se faamatalaga i le silasila a le faamasinoga e iloa ai sa alu lē ua molia ma lona faamoemoe e faaoo le maliu.
E sefulu tausaga na faataoto ai le fua a le faamasinoga mo Loine, ae na toesea tausaga e lima ona o nisi o itu lelei e pei o lona ioeina o le moliaga, faia lana sala i le nuu, aemaise faatoa tulai lea i se solitulafono.
Na totoe ai le lima tausaga lea ua nofosala ai i le falepuipui.
