Lima moliaga tetee i ai Tupuola Terry Tavita

Ua atofaina nei e le faamasinoga le aso 25 ma le 26 o Mati e suesue ai moliaga faasolitulafono o le faaoolima matagā ua tuua‘ia ai le faatonu o le nusipepa o le Savali, o le nusipepa ua leva a le Malo Tutoatasi o Samoa.

O le faataatiaga lea o fuafuaga a le faamasinoga faaitumalo ua faasee ane i ai le mataupu ina ua ave i tua e leoleo ma faaleaoga e le faamasinoga maualuga le moliaga o le taumafai e faatino se faigaaiga fai faamalosi na muai molia muamua ai e leoleo.

O le aveesea ma le faaleaoagina o lea moliaga ua iai ma moliaga e lima o le faaoolima matagā ua molia ai le afioga Tupuola Terry Tavita, lea ua tuuina atu ai e lana loia le tamaitai o Diana Roma le tetee a lē ua molia.

O le Aso Lua na tea nei na valaauina ai le mataupu i le faamasinoga faaitumalo i luma o le tamaitai faamasino le afioga Mata Tuatagaloa. Na faailoa ai e le tamaitai faamasino e iai lona aafiaga poo le conflict of interest i le mataupu ma ua lē mafai ai ona faaauau lona tauaveina. O le afioga i le faamasino o le faamasinoga faaitumalo Vaepule Vaemoa Vaai, ua faasee atu i ai mo le suesueina o molimau a leoleo ma molimau a lē o loo molia.

O le masina o Tesema o le tausaga ua mavae na molia ai le faatonu o le Savali e leoleo ina ua faaulu atu se tagi a se tamaitai o loo aoga faatusitala i le Iunivesite aoao a Samoa, faasaga i le afioga Tupuola Terry Tavita. O le lipotia o le saofai a le alii fusu mai Niu Sila o Joseph Parker na tulai mai ai tuua‘iga a le tamaitai e ana le tagi.

O loo maua le totogi o le alii faatonu a o faamalolo ai ma lana galuega. O se tasi o tusitala sinia a le nusipepa a le Malo le susuga Le Mamea Ulafala, ua tofia e le Palemia na te tauaveina tiute o le faatonu mo le vaaia o le aufaigaluega ma le tapenaina uma o lomiga tai vaiaso a le nusipepa a le Malo.

O loo iai foi se tusi a le aufaigaluega a le nusipepa ua taatia atu i le Palemia ua faailoa ai lo latou lē toe mananao e foi atu le faatonu e faaauau ona tiute e pei ona masani ai.

O le mafuaaga ua lē fiafia ai nisi o uiga ma amioga faaalia a le faatonu, ona ua soli ai le va tapuia i nisi o ana lafoga e masani ona lafo a o faafofoga le aufaigaluega aemaise le itupa o tamaitai.

O loo tatala Tupuola i ni aiaiga o le saini i le ofisa o leoleo i vaiaso taitasi ma taofia foi lona tusifolau i le ofisa o faamasinoga e faatali ai le taimi e mae‘a ai lona faamasinoga. Sa tolu aso o le vaiaso sa saini ai i le ofisa o leoleo, peitai ua faaitiitia i le na o le tasi le aso.

 Le faatonu o le nusipepa a le Malo o loo faamalolo lē tumau, afioga Tupuola Terry Tavita