Ua maua le fitu pasene o le siitaga o totogi o faiaoga a le Malo ma ua siitia ai le faamanuiaga tau tupe e maua e faiaoga uma a le Malo. Peitai o se siitaga o loo matamata fua ai faiaoga o loo galulue i aoga a ekalesia ma aoga tuma‘oti.
O le mafuaaga lea o le finagalo ua a‘e a le asosi a tama ma teine tuai o le Malisi, o le a agai e faaleleia totogi o faiaoga o loo galulue i le Kolisi o Sagato Iosefo i Alafua. E $30,000 ua foai e le asosi mo lea fuafuaga ma ua talileleia e le pulega o le kolisi le agalelei o le Malisi tuai.
O sui o le Malisi tuai o tama ma teine sa aoaoina i tausaga ua mavae e lē gata o le Malisi i Mulivai, ae faapea foi i le kolisi o Sagato Iosefo sa i Lotopa, lea ua siitia i Alafua. Fai mai le alii Felela pule lua, o se mitamitaga lea o le kolisi ona ua iai se faaopoopoga e maua i totogi o faiaoga ona o lea ua alu i luga totogi o faiaoga a le Malo, ae e lē o iai se tulaga faapea i faiaoga a le kolisi. O le tausaga ua mavae sa foai foi e le Malisi tuai le tolusefulu afe ae tuusa‘o i le faaleleia o vaega o loo aoaoina ai le fanau.
O le Misasa Paia sa osia i le Malumalu o Maria Imakulata i Mulivai Apia i le Aso Faraile ua mavae, sa auai uma tama ma teine o le Kolisi.
O le molimau i le sauniga lotu sa manino o se Misasa e talosia ai galuega o le tausaga ae ua fafaga ai foi i meaai faaleagaga loto o tama ma teine aoga ia manatua le usiusitai ma savavali i aoaoga faakerisiano.
O se sauniga foi sa ave ai fautuaga a le ositaulaga i alo ma fanau a le ekalesia ma le atunuu o aoaoina i Sagato Iosefo, ina ia tuu nisi o faaletonu sa tauvalea ai le igoa o le kolisi i tausaga ua mavae, e pei o le faamimisa ma tausolomua ona faia o amio lē lelei, lea sa aafia ai ma nisi o fanau o loo aoaoina i nisi o kolisi a le Malo i le taulaga o Apia.
O le mātau lea i ai, ona ua avea faaletonu nei i tausaga ua mavae, ua mumusu ai lava nisi mātua e toe ave a latou fanau i le kolisi. E oo lava i mātua o loo tapuai i le ekalesia Katoliko ua ave o latou alo i kolisi a le Malo ma aoga tuma‘oti poo kolisi a isi ekalesia.
O le taualuga o le Misasa o le foai a le Malisi tuai, lea na vaaia ai le laumata fiafia o fanau aemaise o fofoga olioli o faiaoga o le kolisi ua maua si faaopoopoga i nai o latou totogi.
