O le vaitau o le 1950 na amata ai ona faalogoina le igoa lea – o le i‘a o le vaimagalo o le Tilapia. O se i‘a ua tele tausaga o taumafai tagata Samoa e faasao ma fai ai faasao o i‘a ae e lē o vaaia lava i le maketi o i‘a i faatauga masani o aso taitasi.
O le mafuaaga na faaalia e le Ofisa o Faigafaiva ona ua masani lava tagata Samoa i i‘a o le sami. E faa‘ona‘ona ma o le tilapia e leai ma se manogi i‘a lea mai i le sami. Mai i le vaitaimi o le 1950 e na o le to‘a 39 i latou ua faapea ona fausia ni nofoaga mo le faasao ai o le tilapia.
O le faaaliga tele la lea na faia nei a le Matagaluega o Faatoaga ma Faigafaiva ina ia mafai ona faalautele atu le i‘a lenei, muamua i totonu lava o le maketi i Samoa nei faato‘ā vaavaai loa lea i le agai i maketi i fafo mo le faatau atu ai o lenei i‘a.
E toatele na oo atu i le Maketi o I‘a i Savalalo mo lea faamoemoe ma na toatele foi na faaalia e manaia lava le tofo o le aano o le i‘a.
O le mafuaaga o le unai o le atina‘e lenei, ona o se tasi lenei o galuega ua fuafua le ofisa o Faigafaiva e faataunuu ina ia ausia ai manaoga o le iai o nisi auala e maua ai pea le taumafa.
O le unai lea atumotu o le Pasefika ia lava taumafa a atunuu uma ma o le unai foi lea a Malo Aufaatasi i lana manulauti.
O faasao ua vaaia i Samoa ua aofia ai le toe faaleleia o faasao o le faisua, ae o le isi la lenei faasao ua taumafai ina ia tele i Samoa o le atina‘e o le tilapia.
Ua saga faamalosia galuega mo lea ituaiga atina‘e ona o tagata mai atunuu Asia ia ua tele foi ua faamautu ma nonofo i Samoa ua vaaia le fiafia tele i le i‘a ma o lea la ua agai loa i ai i latou ua iai atina‘e nei mo oka o tilapia.
Faaalia e le Ofisa o Faigafaiva o lea ua amata vaaia le tatala mai o le avanoa i atunuu o Asia ua masani i le tilapia ma ua amata ai nei ona faamalosia fagaga i Samoa.
O le faafitauli foi e pei ona vaaia i le tele o atina‘e o faatoaga ia ua amata faalautele atu i fafo, o le mautinoa e lava le i‘a pe a oo ina sau oka mai fafo. O le taimi la lenei ua ave pea le faamuamua i totonu o Samoa ma le taumafaiga lea ina ia fiafia tagata o lo tatou atunuu i lea foi taumafa.
Sa iai foi ma nisi e fai faletalimalo i lenei faamoemoe i le Maketi o I‘a. O le afioga Tuatagaloa Joe Annandale o le pule o le faletalimalo o le Sinalei i Siumu, ma o lona oo ane i le tofoina o le aano o le Tilapia na ia ta‘ua ua mafua ona o le iai o manaoga o tagata tafafao mai i le i‘a lea, ma o lana aufaigaluega e gasesea taumafa, na mafai ona malaga faatasi atu ina ia vaavaai pe mafai loa ona amata ni oka mai i le mamalu o loo faasaoina lenei i‘a auā le faaopoopo ai i taumafa e gasese mai i lea faletalimalo.
Faaalia e Tuatagaloa o le vaavaai lava lea ina ia faaopoopo foi ni taumafa i le MENU a le faletalimalo ma o le mafuaaga lea o le oo atu.
O lea foi ua iai nisi o galuega ua faia e i latou o loo faasaoina lenei i‘a ina ia tau sui ai le tofo ia pei o le tele o i‘a o le sami.
O lea auala ua mafai ai nei ona sui le vai magalo i le suasami i po ae a oo i le ao ona sui loa lea o le suasami ma toe foi ai i le vai magalo mo le aso atoa e tuu ai le i‘a. O soo se auala lava ina ia mafai ai ona faatau atu lenei i‘a i le lumanai.
