Ua manumalo Kris Faafoi, o le sui a le vaega faaupufai a le Leipa i le palota laititi na faia i le itumalo o Mana i Ueligitone i le Aso Toonai ua tea.
E 1,080 palota na manumalo ai i lo le sui a le National. E totoe na o le 1,404 palota faapitoa e lei mae‘a ona faitauina ona aloaia loa lea o le faaiuga o lenei faigapalota. O le Aso Lulu, le aso 1 o Tesema, e mae‘a ai le faitauina o ia palota ma faasilasila faalauaiteleina ai loa le iuga o le a iai. Ou te talitonu e lē suia lava le iuga, e manumalo lava Kris Faafoi.
E momoli atu la‘u faafetai tele i le tatou atunuu o loo e‘e ma afifio i aai eseese o le itumalo o Mana, aemaise susuga i faafeagaiga ma laulauafono o ekalesia taitasi o loo tala faauto le talalelei i itu e fa o Porirua.
Faafetai i la outou tapuaiga mamalu. Faafetai mo talosaga. Faafetai mo fautuaga ma timaiga ma le faatinoina o tiute lelei. Faafetai foi mo le lagolago i lenei galuega fita, aemaise o le faalauaiteleina o aiā tatau faaletagata sitiseni o Niu Sila, o le faatinoina lea o le aiā tatau ia palota.
Taatia poo fea na palota i ai le tagata lava ia, o lana lava saolotoga ma le faitalia faaletagata soifua, o lana aiā tatau e fai ai lana filifiliga poo ai e lagolago ma palota i ai. Pau o le naunautaiga ia te au na mafua ai ona solivale maota ma faletatalo i Mana – ia palota o tatou tagata ma faailoa atu ia Niu Sila atoa, o le palota a tagata Pasefika, o se palota malosi tele.
Faafetai tele ia i latou na faataunuuina latou palota – o tiute tauave ia o le tagata sitiseni o Niu Sila. O le palota foi o se tiute tauave faatemokarasi ma ou te talitonu e faatāuaina e le tatou Tapaau Silisiliese auā o ia e ana le saolotoga, ma o lenei saolotoga ua vavae mai faameaalofa mo tatou e faavae ai o taātou olaga faaletagata soifua i lenei lalolagi.
Ou te talitonu o soo seisi e lē faaaogāina lenei meaalofa ua faatamala i le meaalofa na foai mai le lagi e faavae ai le lalolagi, ma ua faoa lona saolotoga pe afai e lē faaaogāina lana aiā tatau e palota ai.
Ua fai mai le Malo e ui na malolo le latou teine, ae ua telē le afaina o le vaega faaupufai a le Leipa ona na o le 1080 na va ai le manumalo a Kris Faafoi pe a faatusatusa i le silia ma le 6,000 na manumalo ai le afioga ia Luamanuvao Winnie Laban mai le sui a le National i le faigapalota faalauaitele o le tausaga 2008.
Ua manatu ai nei le vaega a le National ua foliga faigofie nei ona latou manumalo i le itumalo o Mana pe a oo atu i faigapalota faalauaitele o le tausaga 2011.
Ou te talitonu lava a‘u ia, o le tagata ua manumalo o le tagata lena ua sili. E lē manumalo se tagata e tū-lua. O le isi itu tāua o lenei faigapalota, o le taimi muamua lea ua tulai ai Kris Faafoi e fai ma sui tauva o le vaega faaupufai a le Leipa. O le taimi muamua foi lea ua auai o ia i faiga polokiki. E ui i lea, o lea ua manumalo Kris Faafoi ae faiaiga le sui a le National.
Afai foi tatou te tagai i le taumafaiga a le teine a le National e lē o se tagata faatauvaa. O ia o se tagata maumea ma o lona toalua o loo umia ni tofi maualuluga i le Malo faapea foi ni tofi i le
vaega faaupufai a le National. E lē o se taimi muamua lea ua tauva ai o ia i ni faiga kemupani mo le National. Sa tauva foi i le tausaga 2008 ma maua ai le 11,915 o ana palota.
E ui i lea na o le 9,317 le fuainumera o palota na maua a le teine a le National i le la tauvaga ma Kris Faafoi. O lona uiga e 28 pasene ua pa‘ū ai ana palota na maua pe a faatusatusa i ana palota na maua i le tausaga 2008 i le la tauvaga ma Luamanuvao.
E fiu lava le National e faafoliga ua faigofie nei le itumalo o Mana ona o le maualalo o palota na maua e Kris Faafoi, ae ou te talitonu lava a‘u o le itumalo o Mana, o le itumalo a tagata e talitonu ma faatuatuaina le vaega faaupufai a le Leipa.
E pau lava le itu mulimuli e momoli atu ai se lagona vaivai mo le silafia a le tatou atunuu, ona e toatele i latou e lei palota i lenei faigapalota. E 48,000 latou na resitalaina e palota mo le itumalo o Mana i le tausaga 2009. Peitai ane, na o le 22,387 latou na faataunuu le faiga o latou palota lea na manumalo ai Kris Faafoi. O lona uiga e lei ausia le 50 pasene o tagata na resitala mo le faigapalota lea. A o le toatele foi o i latou nei, o tagata Pasefika, ae toatele lava le tatou atunuu. Ou te lagona ai lava le faanoanoa, auā afai o le faiga lava lea o tatou tagata le nofo faatamala i tiute tauave faaletagata sitiseni o Niu Sila, ma le faataunuuina o a latou palota, e faigata ai lava ia i tatou o loo palota ona finau malosi mo le manuia o latou nei e lei palota.
Pau lava le auala e mafai ai ona avea tagata Pasefika ma se vaega malosi pe paoa i le silafaga a Niu Sila atoa o le tulai lea o tatou tagata e palota. Pau lava le auala e amanaia ai se leo o tagata Pasefika pe afai lea e oo i le 90% le aofai o fuainumera o tatou tagata e palota i soo se palota. Ae afai o le a faamasani lava tatou na o le palota o le 47% e pei ona iai i Mana, e faapea ai lava le faigamalo, tuu ai pea le au Polenisia e pologa ai pea.
