E loa ona silafia e tatou uma, e faasā i le tulafono ona faaipoipo se isi, ae lei tatalaina se faaipoipoga muamua na faia ma se isi tagata.
O le “Bigamy” o le toe fai lea o se faaipoipoiga, ae lei tatalaina le faaipoipoga muamua. E mamafa le sala pe a uia e se isi lenei tulaga solitulafono. O le falepuipui lava e oo i ai le tagata solitulafono i lea tulaga.
Ua ou ta‘ua lenei tulafono ona o se faafitauli ua tulai mai i se mataupu na ou tau i ai a o o‘u iai i Samoa i le vaiaso na tea nei. Sa ou faia tapenaga faaloia e tatala se faaipoipoga a se isi ua toe fia faaipoipo. Sa ou sailii le ofisa e lesitala ai faaipoipoga i Samoa mo se faamaoniga o le lesitalaina o le faaipoipoga muamua, auā e manaomia le faamaoniga o le lesitala o le faaipoipoga muamua, mo le tatalaina faaletulafono o le faaipoipoga.
Ua ou foi mai i Niu Sila ma se faamaoniga mai i le ofisa e lesiatala ai faaipoipoga, e leai se faaipoipoga na lesitalaina, mo le tagata lea ou te faia ana galuega faaloia.
Ae ou te lei foi mai i Niu Sila, sa ou faafesootai le faifeau na faaipoipoina le ulugalii, pe moni sa ia faia se faaipoipoga a le ulugalii lea na ou ta‘ua i ai suafa, ma le aso na fai ai le faaipoipoga.
Sa tali mai le faifeau e moni sa na ia faia le faaipoipoga.
Sa ou fesili poo fea le ofisa sa lesitala ai faaletulafono le faaipoipoga. O le tali mai a le faifeau, na te lē manatua pe na ia lesitalaina lea faaipoipoga pe leai i Apia.
Fai mai le faifeau o le tele o faaipoipoga na te faia e na te tuuina pepa e o lava le ulugalii laua e lesitala i Apia le la faaipoipoga.
E Solitulafono le Faifeau poo se isi e iai le Tiute e fai Faaipoipoga, pe a lē Lesitalaina faale-Tulafono le Faaipoipoga:
O loo manino le tulafono a Samoa i tiute o faifeau ma i latou e faia faaipoipoga.
I lalo o le tulafono a Samoa o le Births Deaths and Marriages Registration Act 2002
Part VI Section 55: “Marriages in Samoa must be registered …” O faaipoipoga uma i Samoa e tatau ona lesitala i lalo o le vaega lea o le tulafono.
Part VI Section 57: “Marriage Officer must notify marriage – Every marriage officer who solemnises a marriage in Samoa must notify the Registrar of the marriage within 14 days from the date of marriage”. O lē na te faia le faaipoipoga e na te lesitalaina le faaipoipoga.
O i latou uma latou te faia le faaipoipoga e tatau ona lesitala le faaipoipoga i totonu o le 14 aso mai le aso o le faaipoipoga.
O loo manino le tulafono. E lē o le ulugalii faaipoipo e o lava laua e lesitala le la faaipoipoga, pe a uma ona faaipoipo, e pei ona ta‘u mai ia te au e le faifeau na ou talanoa i ai. I luga o le tulafono, afai e sa‘o le tusi mai le Ofisa e lesitala ai faaipoipoga, lea ua fai mai e leai se faaipoipoga a le ulugalii lea na ou sueina ua lesitalaina; o le faifeau i lo‘u iloa, ua solitulafono.
O le tele o faafitauli lea ua tulai mai ona o le faatamala o faifeau ma le lē saili muamua ia fai malamalama ai foi o latou tiute i lalo o le tulafono. O le faaipoipoga lea outeaua, safaiile 2007. O le tulafono pei ona ta‘ua i luga, e tatau ona lesitala i le tulafono le fai faaipoipoga i le 14 aso mai le aso o le faaipoipoga.
E tele faafitauli ua tulai mai, e lē gata i le tele o tupe e alu i le tau faasa‘oina o le mea sese ua fai, ae o ola o tagata ma o latou aiga o loo afaina:
• Afai o apalai se nofomau i Niu Sila, e tele faafitauli e taofia ai le sologalemu o faiga o pepa Malaga a sea tagata. Afai e iai ni tamaiti, e aafia nei tamaiti ona e lē mafai ona aooga i Niu Sila pe a lē iai ni pemita nofomau o mātua. E moni e mafai ona aogā pea i ai pemita Student Permits ae taugata tele tau o aoga i tagata asiasi mai i Niu Sila.
• Afai o se ulugalii sa faaipoipo ma ua tetea, e lē mafai ona tatala faaletulafono se faaipoipoga ae lei lesitalaina. E muamua ona lesitala faaletulafono, ona apalai ai lea i le falefaamasino e tatala le faaipoipoga, pe a ua tetea le ulugalii.
• E tele tupe e alu i feuiaiga, talu ai le faatamala.
E tusa pe o le faifeau e mafai i le tagata ua afaina, ona ave i le tulafono le faifeau i le lē faia o lona tiute. E lē gata i le alu o tupe ma le taimi i le faiga o tagi i le fale o le malo, ae ta‘uvalea le lotu ma le galuega a le Atua, talu ai le faatamala o faifeau.
E tatau foi i tagata sa faaipoipo ona nofouta i nei mea tutupu, ma tapa e le ulugalii, mai i le faifeau, pepa ua faamaonia ai, ua uma ona lesitala le faaipoipoga i le 14 aso mai le aso o le faaipoipoga.
E sili le puipuia i lo le togafitia.
