Pei se logo tagitagi i taliga leo alofa o mātua, auā e leai se matua e manao e leaga sana tama, e mananao uma ia manuia.
Ina ua sau Ioane, fai mai le Tusi Paia, o ia o le leo e alaga i le vao. Leo alofa. O le avea‘i, ia teuteu le ala o Ieova.
E iai le leo o loo musumusu atu ia te oe ina ia e talia o ia auā o ia o le pogai o le ola. Iai foi le leo lē alofa, e manao e faatoilalo lou tagata nei e manuia. Satani.
Ia mataala auā o le mafuaaga lea ua lē iu lelei ai nisi, o isi ua falepuipui, nisi ua maimau soifua, lē gata i lea ua faaleagaina ai aiga. Mataala, auā fai mai le Tusi Paia o Satani o le tamā o le pepelo.
Ae peitai o le leo o lo tatou faaola i luga o le satauro, Lou Tamā e, faamagalo atu ia i latou auā ua latou lē iloa le mea ua latou faia. Leo o le alofa moni.
O le tusi filifilia, fai mai ua te‘i ane le leoleo o le falepuipui sa moe, o le mea muamua lava na tau i ai lana vaai o le faitotoa ua matala.
E lei vaai le leoleo o le falepuipui i le taimi na tutupu ai vavega ae sa i ai i le nofoaga lea, e mafai ona tatou i ai i le lotu ae o loo faapogisaina le ta vaai ona o tuinanau ma le agasala ua tatou le vaai ai i vavega ma le manuia ua uma ona ia saunia mo tatou.
Vaai a le tagata ua leai sona faamoemoe, e fetaiai loa ma faafitauli fai loa ma le faaiuga manatu lava ia o le tali lea. E lē o le tali o lou faafitauli o le pule i le ola, ua iloa e le leoleo o le falepuipui e lē mafai ona toe maua mai tagata aua lea ua matalatala faitotoa o le falepuipui, ua na iloa foi lona iuga o le oti.
Aua nei vave faia sau faaiuga ona o mea ua e vaai atu i ai aua foi ne‘i faaseseina oe i ou lava manatu auā e leai se mea e faigata i le Atua.
Ua alaga le aposetolo o Paulo ma le leotele ua faapea atu aua ne‘i faia e oe se mea e leaga ai oe, auā e leai se isi ua alu o loo iinei uma matou.
Faafetai i le aposetolo Paulo ona e lei iai se loto tauimasui auā e mafai ona faapea tuu pea e pule i lona ola auā e loka fua e leai se mea sese na fai ae peitai o le tagata sa moni lona alofa.
Fesili aisea ua taumafai ai le aposetolo e laveai i le leoleo o le falepuipui? Ua iloa e Paulo o ia foi o le tagata sa toetoe a fano, ae peitai o le alofa tunoa o le Atua lea na toe laveaiina ai lona tagata mai le faafanoga.
O le fautuaga, poo ā uiga o tagata poo amioga ua lē tautamalii i lau silasila, tatou alolofa pea i ai ona o le Atua.
Fai mai Paulo leaga na maliu ai foi Iesu e le na o oe ma au la ae o le lalolagi uma.
Ae le gata foi i lea na manatu Paulo i le agaga o le tagata ne‘i fano. Ua e iloa o i tatou o le palealii o ana galuega na faia i lona faatusa? E vaai ma le faanoanoa ona e tele ni soifua ua agai atu i seoli, ae ia avea lou tagata ma leo o le faaola e laveaina mai ai se agaga puapuagatia.
E lei faia seoli mo i tatou, sa ia faia mo satani ma ana au, ae o oe ua uma na saunia le manuia e faavavau mo oe.
Momoli le agaga faamalo, i le leoleo o le falepuipui ona ua sa‘o lana filifiliga, auā poo le a foi se alofa o Paulo i le tagata, ae a le finagalo malie i ai, na te lē vaai i le lelei o le Atua.
Poo le ā foi le silisiliese o le alofa o le Atua mo oe ae afai e le malie lou loto ia e le ai se mea e mafai, aua e pule lava sitafune i le la o lona vaa.
Ia faamaualalo tatou tagata i lalo o le satauro o Iesu.
Ina ua maualalo le loto na ia fesili ai po le a la se mea na te faia e maua ai le ola.
Ua tatou iloa e le ai lava se isi igoa, e le o le igoa Paulo poo le igoa o faigalotu, poo se igoa o se matai taua o Samoa ae o le igoa o Iesu.
O le igoa fai mai le Tusi Paia e toatutuli i ai tulivae uma e tautau e laulaufaiva e paia. A o agai atu Peteru ma Ioane i le malumalu sa faatoga mai ia tei laua le tagata pipili, lea sa nofo i le faitotoa o le malumalu ua igoa o matagofie, fai mai Peteru e le ai se auro poo se ario ae o le suafa o Iesu.
E le ai se mea e pito sili ona manaomia e le tagata i ona po nei, na o Iesu aua o ia o loo i ai le tali o lou manaoga ma soo se faafitauli.
Vaai poo iai se avanoa o Iesu, auā na talia e le leoleo o le falepuipui Iesu manuia ai o ia ae ua manuia ai foi lona aiga.
Fai mai le pese ua masani ai tamaiti i le aoga aso sa, a iai Iesu i se tamā o se aiga, o se aiga fiafia, faapena foi ia tina e oo lava i fanau.
O se aiga, e leai se faanoanoa ae na o le fiafia. Toe faaulufale Iesu i lou aiga auā o ia e manuia ai tatou.
Soifua ma ia manuia.
