O le tofo o le fasipovi mai i Samoa ua tele ina viivii e i latou e iai le tomai i le gasesega o taumafa.
Ae e pei lava o le tele o oloa ua avatu i Samoa, e iai lava le faafitauli tele lea o le lē lava o ia oloa pe a amata loa ona agai mai manaoga mai i maketi i fafo.
O le taimi lenei e lē o iloa poo le ā tonu le numera o le manu papalagi i Samoa.
O lea ua iai le fuafuaga mo se uta o manu papalagi ina ia taofia ai le tulai mai o le faafitauli tele ua feagai pea ma le aufai faatoaga ma le au gaosi oloa o Samoa.
Faaalia e le Afioga Le Mamea Ropati, le Minisita o Faatoaga ma Faigafaiva, o lea faato‘ā toe amata ona faamautu se faitauga o manu papalagi uma o loo i totonu o Samoa.
O se auala ina ia mafai ona fuafua lelei poo le ā le faaopoopoga e moomia pe afai o le a agai loa i latou ua fai lafu manu i le atunuu e fasi le manu papalagi ae faatau atu i fafo lona aano.
O se galuega tele e mautinoa lea itu auā o le taimi lenei ona pau le manufasi poo le fasipovi lea e alu atu i le Pasefika mo atunuu mamao e sau mai i Vanuatu.
Faaalia e le sui o le tautua Samoa, Afualo Dr Wood Salele, o le uta lea ua faalauiloa mai e le Minisita o Faatoaga o se uta ua aumai sa‘o lava mo atina‘e ma le faafeusuai ai o manu papalagi i Samoa nei.
Ua mafua lea tulaga ona o manu papalagi na aumai i le 20 tausaga talu ai, ua moomia se suiga i faafeusuaiga.
E ioe foi Afualo e lē fesiligia lava le lelei o le aano o le manu papalagi i Samoa. Faaalia e le tamaitai o loo faauluulu i ai le vaega o taumafa ma vaiinu a le Faletalimalo o le Sinalei, e matuā sili atu le lelei o le aano o le manufasi i Samoa nai lo aano o manu fasi ia ua tuu aisa ma aumai mai i atunuu mamao.
“O le toatele lava o malo a le faletalimalo e faaali le fiafia atu i le aano o le povi a Samoa,” o se faamatalaga lea a le tamaitai o Sharon Greene.
“E toatele foi e lē talitonu pe a fai atu o le aano o lafu manu i Samoa nei – e ese lona tofo auā e na o le vao lava lea e tele ina fafaga ai, leai nisi vailaau poo nisi ituaiga meaai e fafaga ai”.
Ae na ta‘ua foi e lenei tamaitai e matuā moomia lava le lava o le povi i Samoa ina ia tali ai i manaoga o tagata asiasi mai i Samoa ma le lautele lava o le atunuu latou.
Na toe foi lava i Vanuatu le talanoaga ma na faapea mai Afualo Dr Wood, o le auala o loo faatino ai atina‘e o manu papalagi i Vanuatu e tatau ona faataitai i ai Samoa ma o le taimi lenei o le matuā tele o le uta o fasipovi ia ua sau mai i Vanuatu auā maketi i fafo o loo tautuaina i le taimi lenei.
Faaalia e Afualo na feiloai ma ni sui a faipule o Vanuatu ma o le latou faamatalaga e matua maioio lelei lava vaega uma o lenei atina‘e ina ia mautinoa le lelei atoatoa o le aano o le povi o loo faatau atu i fafo ae o fanua lava e amata mai ai, lea e fua le tele o le manu papalagi i le lafumanu i le tele o le fanua.
O le fua faataitai a Vanuatu e tatau ona tasi le manu papalagi i le eka o le fanua e tasi.
O lona uiga a 10 manu papalagi e tatau ona tataa ma fai le atina‘e i ni eka se 10. Faaalia e Afualo e mautinoa lava le faigata ona faataunuu o lea faataitaiga e tasi i Samoa nei ona o le utiuti o fanua e maua e nisi mo ia atina‘e ma na o ni nai tagata e iai fanua tetele faapea.
E faamalosia lava le tausi faalelei o ia lafu manu e pei ona ta‘ua e Afualo – ma e lē aogā ai le ituaiga fai manu papalagi lea o le nonoa solo i laau ma e alu le ta‘i fia o aso e leai se vai e maua e ia meaola.
Faaalia foi e le alii faipule ua tatau foi ona aveese le manatu lea e ave lava le faamuamua i faalavelave – ma e solo atoa lava le tafasi o manu nei i taimi o ia faalavelave, lea la e mafua ai le lē mafai e le toatele o le aufai lafu manu ona faaaauau atina‘e faapenei.
