Ua apo e le pulegamalo a le Atu Kuki faiga tau pisinisi i auala o fesootaiga a le kamupani o le BlueSky Samoa ma ua faamatuu mai i ai le 60 pasene o sea o le pisinisi tau fesootaiga a lea atunuu e umia e le kamupani a Samoa. O le BlueSky lava ia o lona faavae na amata mai i Amerika Samoa, oo mai ai i Samoa Tutoatasi ina ua latou faatau foi se vaega tele o sea o le SamoaTel.
O lea la ua iloa nei, ua sili ona faatuatuaina ana faiga tau pisinisi e le Malo o le Atu Kuki ma ua fia tala mai i ai lona gafa tau fesootaiga i telefoni ma fesootaiga televavave faaonapo nei le initaneti. O le pese mālie lea a le minisita o tupe o le Atu Kuki le susuga Mark Brown, ina ua valaaulia e le kamupani e avea ma a latou malo faaaloalogia i le Aso Faraile ua mavae, lea sa faia ai se tali faaaloalo a le BlueSky Samoa mo le alii minisita.
O le ausiva a le susuga Leota Lene o le Siva Afi Design na faafiafia mo le alii minisita ma sui o le Komiti faafoe o le BlueSky Samoa, sosoo ai ma le tauvaga o pale fugalaau felanulanuai o se tu ma se aga a le Atu Kuki na auai tamaitai o le kamupani, ma o le alii minisita na faamasinoina tamaitai e toatolu e sili ona matagofie o latou pale.
Na faataamilo le matamataga a le alii minisita i le ofisa autu atoa o le BlueSky ae taualuga i le taumafataga o le aoauli. O lea tali faaaloalo e faaalia ai le fiafia o le kamupani i le faigauo mafana ua amatalia ma le kamupani tau fesootaiga a lea atunuu o le Pasefika, o se uo mamae foi a Samoa.
Na saunoa le minisita o Mark Brown ma ia faailoa le agaga fiafia o le latou pulegamalo i le tautua ua oo atu a le BlueSky o le a lē masalosalo le siitia ai o fesootaiga i lo latou atunuu. Na ia faaalia foi le tele o ni faamanuiaga o le a maua e tagata o le Atu Kuki auā o le a avea foi le iai o sea o le BlueSky i le faalapotopotoga o tupe teu faamavaega tausi le UTOS a Samoa o le a penefiti ai ma latou.
O le isi itu o loo silasila i ai lea Malo o se auala e sailia ai se malaga a se vaalele e tuusa‘o i le va o Samoa ma le Atu Kuki lea na ia ta‘ua e na o le 2 itula ma le 30 minute, ae o le taimi nei e tolu itula e malaga ane ai mai le Atu Kuki i Aukilani Niu Sila, ona toe malaga mai lea i le lata i le fā itula i Samoa.
O tausaga ua mavae sa iai se tautua a le Polenisia i le va o atunuu e lua, ae na alu alu faamuta ina ua lē maua ni tupe lelei a le kamupani vaalele a Samoa ona o le tau leai o ni tagata malaga.
O lea ua faailoa e le taitai o le Malo i le fonotaga a le Palemene i le amataga o le tausaga, le iai o se tulaga silasila a le Malo i le toe lalaga mai o se kamupani vaalele e faafoe lava e Samoa, ona ua foliga i le faaaipoipoga a le Malo ma le Virgin Australia, ua lē toe iai se tauvaga ma le Ea Niu Sila ae ua faauouo ma faifai mea faatasi foliga i se ulugalii kamupani vaalele nei e lua.
Atonu o le a taunuu ai le miti a le Atu Kuki e toe iai se malagaa tuusa‘o a se vaalele i le va o atunuu e lua. O loo umia pea e lea Malo le 40 pasene o sea o le latou pisinisi tau fesootaiga ae na o le 60 pasene ua faatau nei e le BlueSky Samoa.
