Ua agai le afioaga e tuuaia le soonafai o lo latou aiga i le osofaiga a Leoleo i le amataga o le vaiaso na tea nei, lea ua maliu ai se sui e toatasi o le nuu.
Ae o loo unai mai foi le pito laau latou a Leoleo, o le a lava le faalavelave na tulai mai na amata lava ona o le muai osofai o i latou e le aiga i Faleatiu ma faamanu‘alia ai leoleo e toatolu, lea e toalua o loo taofia lava i le falemai ae toatasi ua toe tea i tua. O faamatalaga o lenei osofaiga mai i itu uma e lua e pei ua e faalogo i ni tala o ata tifaga o taugafana ma laau faasaina.
O sui o le aiga lea na agai i ai le suesuega faafuasei a Leoleo, ua agai i luga o televise ma faamatala le ausulusulu solo i le taeaopo ae osofai atu leoleo ma soona tafana solo o latou fale, na mafua ai le maliu o le alii lea e 39 tausaga le matua o Faleatiu a o sii lona afafine.
O le faamatalaga a Leoleo o le taavale muamua lava a Leoleo na ofi atu i totonu o le fanua o le aiga lenei, na tafana mai a o lei o ese leoleo ma le taavale, ma na pau le gaioiga na sosoo ai a Leoleo o le “cover” ina ia taumafai e toso ese leoleo ia ua lavevea ma toe solomuli ai lava le osofaiga mai i Faleatiu ua le oo ma ua le oo ai foi ma le sailiga o toga maruana ia ua lipotia atu le iai i lea nofoaga.
Faaalia e matai o le aiga na tulai mai ai le faalavelave ua laki le o atu o leoleo e leai ni a latou fana, ae o lea e fai mai leoleo na muamua tafana atu i latou.
O vaaiga i le taavale muamua lea a leoleo na faamaonia ai le faamatalaga a le Ofisa o Leoleo ma le faamanu‘alia ai o leoleo e toatolu i lea osofaiga.
E masalomia foi e leoleo na logo lava le aiga lenei i le osofaiga a Leoleo ua sauni e alu atu ona e taunuu atu ua faatali mai ma fana. E lei faia ni upu i le va o itu e lua ae ua papa fana.
E fesiligia ai la le faamatalaga a matai o le aiga lea faapea e le o iai ni fana a le aiga ae ua osofai solo i latou e leoleo.
Sa iai foi se molimau a se matai o lea lava aiga faapea e toafā lelei leoleo papalagi na o latou vaai o agai atu ma le faitau selau o leoleo sa aofia i lea osofaiga.
O le faamatalaga a Leoleo e leai lava ma ni papalagi na agai i Faleatiu, ma e to‘a 80 leoleo na agai i Faleatiu, ae le faitau selau e pei ona ta‘ua.
Ua tele tausaga talu ona tulai mai vevesi i le va o sui o le afioaga lenei ma leoleo i luga lava o sailiga a Leoleo o toga maruana ua na o le lipotia atu ia i latou.
O le faalavelave muamua lava na tulai mai i le vaitau o le 1980 e lei aafia ai maruana ae o le sailiga o se sui o le aiga lava lenei na sola ese mai i Tafaigata lea na lavevea ai leoleo ma maliu ai se leoleo se toatasi.
O le maliu lona lua o se isi foi leoleo e suafa ia Malo ma o le osofaiga faafuasei foi a Leoleo e saili lava togalaau faasaina nei. Na faaalia e le alii Komesina o Leoleo o loo taumafai pea e faatalatalanoa le mataupu ma saili se filemu i tulai mai nisi foi vevesi, ae o loo moomia le malamalama o itu e lua i lenei mataupu.
O le vaiaso lenei e faia ai le taotoga faapitoa o le alii Faleatiu na maliu ai i lenei osofaiga. Faaalia e le Alii Palemia o le taimi lenei e tuu atu lava i Leoleo lenei mataupu ma o le a faapea ona talia foi se faamatalaga e le Malo auā e maaleale tele le mataupu ma na oo atu lava sui o le aiga e faaali atu lo latou le fiafia i le maliu ai o lo latou tagata.
Faaalia e le Alii Palemia o le mataupu lenei i toga maruana ua mautinoa lava le faigata tele ona o lea e toatele o loo taofia ai i le falepuipui, ma e le solomuli foi leoleo i le faatinoga o le latou matafaioi e saili i latou o loo faia lenei solitulafono o le toto ma le faatau atu o laau faasāina ma atonu a mae‘a le suesuega ma avatu se ripoti a leoleo o le a mafai ai foi ona faaleo mai se finagalo o le Malo, ae o loo ua faataatia atu le faagaulemalie o le aiga o loo aafia ona o lenei faalavelave.
