E soloatoa i le falepuipui i le fasioti tagata faamoemoeina, ae mae‘a ona lau le faasalaga agai na o le pagota i lona aiga e aumai lana atopa‘u auā le amata tuliga o lona faasalaga
Ua alu i luga o le ea ma luga o lomiga tuua‘iga i se isi foi pagota ua sola ma ua saili nei pe ua ia tuua le atunuu.
O le alii o Laki Nauer lea ua mae‘a ona faasala i le soloatoa i le toese i Tafaigata ina ua faamaonia lona fasioti tagata faamoemoeina, o se tuua‘iga na faapea ona faia faasaga ia te ia ona o se faalavelave na maliu ai se taulealea o Laulii ma Faleatiu e suafa ia Foleni Viavia.
O se tuuga taavale na amata molimauina mai lava e nisi o le atunuu mai i Satapuala seia oo mai i Vaitele na mae‘a i le taavale o se van na malaga ai Nauer ma lona toalua ma nisi o lona aiga ae mulimuli atu ai i tua le taavale na alu atu ai Viavia.
O le iuga o lea feeeseeseaiga na maliu ai Viavia ina ua fana e Laki Nauer ma o le molimau a Nauer na ia faaoo le oti ia Viavia auā e mautinoa le agai atu e faaoo foi le oti ia te ia. O se finauga na iloilo i luma o le faamasinoga ae na toe talosagaina e lenei alii ma lana loia le faaiuga.
O le itula la e lua o le Aso Faraile ua mae‘a atu nei, na faamautu mai ai le iuga a le Faamasinoga Maualuga ma ua lē talia ai le talosaga a Nauer ma le faatonuga e soloatoa i le falepuipui e tuli ai lona faasalaga.
O le afiafi lava lea o le Aso Faraile na maua ai faamatalaga na sola ese ai Nauer mai le toese i Tafaigata, ae na ta‘ua e lana loia i nisi o tusitala na fesiligia o ia, o lea lava na ave Nauer i Tafaigata ae ua foliga mai ua toe alu ese lava ae ua agai e tuli lona faasalaga.
Na maua se avanoa o le Samoa Times e fesiligia ai le alii Komesina Lagolago o Leoleo, Fauono Talalelei Tapu i lenei mataupu ma ia ta‘ua ai, e lei taofia Nauer i le taimi na alu atu ai i le lauina o lona iuga ma o le mae‘a o le faaiuga na agai ai i lona aiga e aumai lana atopa‘u auā le amata tuliga o lona faasalaga. Peitai o le alu atuga lava lena a Nauer e lei toe sau ai e pei ona iai le tuutuuga.
Na fesiligia pe na alu Nauer i lona aiga ma ni leoleo e mautinoa ai lona foi ane i Tafaigata ae faapea mai le alii Komesina Lagolago, e leai ona sa iai galuega na feagai ma leoleo sa tiute i le Fale Faamasino na lē mafai ai ona agai faatasi ma le alii o Nauer e aumai ona lavalava i lo latou aiga.
O aiaiga lava e pei ona masani ai, o soo se tasi lava e aumai se faasalaga faapea e leai lava se isi avanoa e toe tatala ai e agai i lona aiga mo ni ona lavalava. O le galuega tonu lava lena a lona aiga pe afai ua manatu e tatau ona avane ni ofu o lē ua molia ma faamaonia le solitulafono ae aua o le solitulafono o le fasioti tagata faamoemoeina.
Na toe fesiligia le alii Komesina Lagolago o Leoleo poo le ā tonu lona finagalo i lea tulaga ae na ia ta‘ua o le faafitauli o lea e lei taofia le alii pagota i le taimi na agai atu ai i le faamasinoga. O le mau a le alii loia Ameperosa Roma, na uma lava ona lau le iuga o Nauer o loa ma leoleo ma le faamoemoe o lea ua ave sa‘o lava i le toese e tuli le faasalaga ae faateia o ia i le logo o ia i le afiafi lava lea e leoleo poo ia silafia se mea o iai Nauer.
Na ta‘ua e molimau i le Samoa Times, na tumu leoleo i le malaevaalele i Faleolo i le po lava lea e tau saili ai pe o le a sola le alii pagota i fafo ma e lei maua ai Nauer.
O le tali a Fauono, e lei oo Nauer i Tafaigata ae o le mau a le alii Loia na ave ae e tuua‘ia lava leoleo i le toe alu ese o lea alii mai i le falepuipui.
