Matatia ausia i le soifuaga a o teinemuli seia oo ina avea ma tina o aiga ma le atunuu
Sa faaee ia te ia le igoa taupou a Fasitoo, le suafa Fuatino, ina ua faatoa 16 tausaga o le soifua. Na umia mai le suafa matai Taulapapa ma le Leaupepe ina o talavou. Tamaitai muamua i le Palemene, toe muamua o se tamaitai e nofoia le nofoa o le Fofoga Fetalai. O se faamasino tamaitai muamua, ma o se ulugalii muamua foi i totonu o le Palemene, toe muamua foi i tofiga faamasino a le atunuu.
Tamalii sa galulue faatasi i le galuega faatausimai pasi, ma le taimi a o iai i le Palemene
E manatua e le afioga Taulapapa nisi o fomai iloga foi a Samoa sa galulue i le vaitaimi a o avea o ia ma tamaitai tausimai pasi. E pei o Dr Sosene, Dr Tapeni, Dr Toomata Tualaulelei, Dr Lance Eves, Dr Taula Anesi, Dr Viali, Dr Lealofi Tamasese.
I totonu o le Palemene, sa iai faatasi ma nisi sa latou uluai iai i le tofiga muamua o le maota fono mai le 1962, ina ua faatoa tutoatasi Samoa.
O nisi foi o tamalii na latou galulue faatasi i le Palemene, e pei o Polataivao Fosi, Seiuli Taulafo mai Sagaga le Usoga, Asiata Lagolago mai Satupaitea, Leaupepe Utumapu o Safotu, o Vui Siafausa, Tupua Siliva o Palauli, Aeau Taulupoo mai Falealupo, Lofipo Kuresa mai Saleaula, Tagaloa Pita mai Palauli le Falefa, ma le afioga ia Vaai Kolone. O loo mafai ona e silasila i ia tamalii, i le ata e pei ona iai. (this refers to that group photo from old Samoan parliament; pls find scanned photo)
Tautinoga
Ou te faafetai i le Atua ona o ana tofiga ma faamanuiaga sa mafai ai ona maua ia avanoa ma galuega. E le gata sa ou tautua ai mo lo‘u atunuu, ae faapea foi lo‘u nuu ma lo‘u aiga. O mea tāua lava ia i le olaga, ae sili ai foi lenei vaitaimi ua tautua ai mo le Atua ma lona finagalo.
O le aganuu o le pale i soo se tamaitai Samoa, o le faavae o le aganuu o le alofa ma le fesoasoani atoa ai ma le faaaloalo. O se tasi lea o vaega o lo‘u olaga e le mafai ona aveesea, o la‘u aganuu e pele i lo‘u loto. Ae silisili lava le ava ma mata‘u i le Atua, o le auala mai lea o faamanuiaga.
Ona o a‘u o se tina Samoa, ae sa iai foi o se tamaitai Samoa, ou te faapea atu ai mo tamaitai uma o le atunuu, ina ia tautuana lau amio ma lau tu i totonu o aiga ma nuu aemaise o le ekalesia. A tali ni malo, o le tamaitai Samoa lava latou e tatau ona iai, o lana lea tu ma le masani. Ia manuia Samoa.
