Sa toe filifilia Leaupepe Taulapapa Faimaala, e avea ma faamasino o le faamasinoga o fanua ma suafa. O le filifilia i lea tofiga, a o le taimi foi lea sa avea ai lona alii Vaovasamanaia Filipo, o se faamasino o le faamasinoga a le atunuu. Ua toe ausia ai foi le isi o matatia, e le gata o se ulugalii muamua i totonu o upufai o le malo i tofiga faipule ma minisita, ae sa toe muaimalae foi i le tulaga tau faamasinoga.
E manatua pea le palemene, ma le amatamataga o lona malo tutoatasi
E feololo mea o loo tutupu mai i le palememne i lenei vaitau, i le matou foi taimi. Ou te manatua e leai ni malutaeao (morning tea), nao le tanoa ‘ava lava a toeaiina e fai i lalo o le nonu i tua ane o le falefono tuai. E usu atu i le taeao taumafa le suā‘ava i le tanoa, amata le fono, malolo ane foi i malologa masani o le fono toe taumafa le ipu ‘ava. A vesia foi finagalo o sui faipule ma vevesi itu e lua, e mapu ane lava i le tanoa ‘ava.
E masuiga malie mea uma i le tofa faatamalii ma le ava fatafata sa lima taitaiina ai le maota. O sui faipule foi mai itumalo taitasi, e silafia lelei auala e faafifilemu ai taualumaga o le fono, aemaise lava o saunoaga faapitoa. A felafolafoai foi, e silafia lelei ona momoli fetalaiga ma saunoaga i le faaaloalo, o upu e matua mamafa ma toetoe a oia ai le maota i ona tulaga maaleale, peitai e atamamai tele toeaiina e faafoe fetalaiga ma iu o saunoaga.
Ou te manatua le toeaina o Leilua Piliae, ina ua taumafai e fai le palota mo le taitai o le atunuu i le tofiga palemia. A o tau fai le palota, ae faapea ane loa Leilua ia Mataafa ma Tamasese, ‘E ke lua gogofo e a.. e leai gi lua leo, e ke lua kau faalogologo poo fea o iai figagalo o aiga, ae le kaukakala mai. E ke lua magagao e uu le ulu, koe uu le siusiu, ao a mea a le akuguu o le a uu?’
E le mafai ona galo lea foi tamalii o le atunuu, e ese le loloto o le tofa ma le faautaga, Kalofa e.
O le taimi o sisiga fua ma le faamanatuina o le tutoatasi o le malo, e leai ni tupe e fai ai, a o le lagolago a afioaga ma itumalo e matautia. E le tau vaavaai pe maua atu ni tupe, ma se taui, ae fai lava i le alofa ma le va fealoaloai. O le malo foi latou e leai ni tupe e faatino ai fuafuaga, ae taumafai lava ona o le loto tetele ma le alolofa i le atunuu. Ailoga a toe maua i lenei vaitaimi lea tulaga.
O le malaga atu o le tupusa, Pope Paulo le V1, sa ou auai foi o se tasi o malo faaaloalogia i lena vaitaimi. O se tulaga maualuga tele foi mo a‘u, aua na o Salamasina Malietoa ma masiofo Rita, ia ma a‘u sa avea ma malo faaaloalogia i le matou itupa. O le malaga lea sa talimalo ai le afioaga o Leulumoega.
