“E lē o faamalieina matou i tali ua aumai e le Matagaluega o Aoga”
Ua lē muta le finau atu pea o mātua o nisi o fanau a Samoa sa lē pasi le suega o le matematika poo le numera mo le Vasega 13, i le fia maua o se tali lelei mo le taumafai a o latou alo ina ia pasi le mataupu, ona o le avanoa lea e mafai ai ona ausia se isi tulaga lelei mo i latou i le saofia atu i aoaoga faaiunivesite.
O le tali a le Matagaluega o A‘oga Taaloga ma Aganuu i le fono faalauaitele poo se public forum i le Aso Toonai na tea nei, e lē toe suia le tulaga ua faatino ai le togiina o le suega. Na pau le avanoa e mafai o le toe togi o le pepa suega, ae lē mafai ona toe sue se isi o le fanau, pe faia foi i le tulaga sa iai muamua o le standardize, poo le toe fetuunai togi ina ia pasi. O le finagalo o le Pule Sili o le Matagaluega o A‘oga, Afioga Matafeo Tanielu Aiafi, o le faiga amiotonu i le togiina o suega, o le tuusa‘o lava lea o togi ua maua e le tama ma le teine aoga, ona iloa ai lea o itu o loo vaivai ai i le mataupu ma faia loa i ai le galuega a faiaoga ina ia fofo le faaletonu.
Peitai o le tali a le matagaluega na folasia i le fono faalauaitele na taloina e le Matagaluega o A‘oga Taaloga ma Aganuu, ua faailoa mai ai e se tasi o mātua le susuga Pa‘u Tafaogalupe Mulitalo, o le a tapena loa le latou talosaga e ave i le faamasinoga e saili ai se tali i le lagona mafatia o nisi o mātua.
O le fitusefulu pasene o le aofaiga e tasi le afe valuselau o fanau na sue i le suega o le Vasega 13, le suega ua ta‘ua o le SSLC e lei pasi le numera. O le mafuaaga lea o le lē maua o ni avanoa o ia fanau toatele e ulufale ai i le vasega amata mo aoaoga faaiunivesite le Foundation Year.
O raw marks poo togi tonu ua maua e le tamaititi ma le teineititi i le numera e lē o toe faia i ai se fetuunaiga ina ia pasi ai. O le faavae lea o le mau a mātua, pe ana faatino pea lea faiga sa iai muamua e maua e o latou alo ma fanau le togi e pasi ai. Peitai o le finagalo manino lava o le Pule Sili o le Matagaluega o A‘oga, o se faiga o loo lafi ai i tua faaletonu e tatau ona saili fofo ai ina ia siitia le poto ma le atamai o le fanau. O le tele o finagalo o mātua na folasia i le fonotaga i le faaiuga o lena vaiaso ua mavae atu, e lilifa i le toe faia o se fetuunaiga ina ia pasi le numera a o latou alo. Peitai o lea fanoga ua saunoa le Pule Sili le afioga Matafeo i le fonotaga, o le a taatia atu se‘i silasila i ai le Iunivesite a Samoa ma le Matagaluega o A‘oga.
Na saunoa se tasi o faiaoga o le numera a o se tasi foi o mātua sa auai i le fono, le susuga i le faafeagaiga ia Vavatau, e faigata tele le pepa o le suega o le numera sa sue ai fanau i le tausaga ua mavae, ma sa ave lana fautuaga i le Matagaluega o A‘oga ina ia ia toe liuliu i ai se finagalo, peitai e lei talia lana tuualalo.
Na toe faaleo lea tulaga e le susuga i le faafeagaiga i le fono, ae e lei tali ane i ai se sui o le Matagaluega o A‘oga. Na faaalia e le Pule Sili o le matagaluega, e lē o ia e tapenaina le pepa suega ae ua iai lava i latou e nafa ma lea vaega. Na te lei faailoa poo ai ia sui o le matagaluega. O le a tuliloaina pea lenei mataupu poo fea o le a agai i ai.
