Leai se Tali a le Toa i le Mate Ma’a

E pei e tau fa’asese i le fa’amoemoe le vave sikoa o le Toa Samoa i le taaloga ma Mate Ma’a Tonga i Campbell Town. Na alu ma le atoa le Toa i le amataga ma maua ai le sikoa a James Cavet i lalo o le pou i le minute amata o le taaloga. Na ova le a’a a Mason Lino ma o’o ai ‘ai a le Toa 6-0. Fa’ato’a toe maua ai a Samoa i le minute 50 o le ta’aloga ae ua sola Tonga ma le malosi ma nofo i faula’iga o ‘ai 36-6. Na toe fa’aopoopo le sala e tasi e atoa ai ana ‘ai 38-22.

Ae mo le isi fa sefulu minute mai le minute lona valu o le taaloga se’ia o’o i le 43 e na’o Tonga, Tonga lava i luga o le malae.  E fitu lelei tatao i le taimi lea aunoa ma le toe tali a le Toa. Na amata e Siliva Havili i le minute valu ae faatini e Tevita Tatola i le amataga o le afa lona lua. I le taimi lea ua 34 ‘ai soso’o a Tonga ae na’o le tau tuli tagata o le Toa i totonu o le malae.

E lei iai ma se tali a le Toa Samoa na mafai. O le mata’utia o Tonga i le tele o aupega ma tama taalo lelei na vaaia i luma ma tua, i le ogatotonu o le malae ma autafa o le malae.  E lei iai ma se avanoa na mafai ai e Samoa ona sailia se vai malu mo ona puapuagatia. Ae e na’o Tonga le malae, na’o fu’a foi a Tonga na agiagia i Campbell Town.

E le fa’apea foi e to’atasi le tagata na faia uma ‘ai a Tonga. E fitu tatao e fitu foi tagata na sikoa (Havili, Hingano, Hurrell, Jennings, Hopoate, Tupou, Tatoala)..

O le afa lona lua na tau ala mai ai le Toa ina ua ‘uma le malosi o Mate Ma’a. E le tio, aua e le’o se mea faigofie le sikoaina o tatao e fitu. A’o le minute 50 na sao ai Tim Lafai i le laina. Toe lima minute ae sao ma Tyrone May, ae faaiu e Jorge Taufua i le minute 63”.

Na’o le pau lelei o le toa o le tauvaga a’a, e tolu a’a a Lino ma ova mai le fa, a’o toga e fa tatao na ova a’a; ma le sala e tasi i le minute 71 o le taaloga. O le sala lea na fa’auma ai e Tonga upu o le taaloga ma sola ai ma le manumalo tele lava. Ua finau ai nei le Malo e tatau ona tauva ma ‘au i le Vaega maualuga o le taaloga e iai le Kangaroos, Egelani ma Niu Sila. A’o Samoa, e matua faigofie tele lava.

Pacific Test

Samoa 22 (James Gavet, Tim Lafai, Tyrone May, Jorge Taufua Tries; Mason Lino 3 cons) Tonga 38 (Siliva Havili, Ata Hingano, Konrad Hurrell, Robert Jennings, Will Hopoate, Daniel Tupou, Tevita Tatola Tries; Siosiua Taukeiaho 4 cons + 1 pen)