Faletua ia Apulu Tolutasi Autagavaia ma ona alo

Faletua ia Apulu Tolutasi Autagavaia ma ona alo

O le olaga atoa o le tina ia Apulu Tolutasi Autagavaia i totonu o lona aiga i Faleasiu e taumulimuli lava ia i le mea e iai lona tamā ma lona tina pe a oo ina o i uta i le mauga. E lē o se tagata e fiafia i ni taaloga e iai tupulaga i lona olaga o se tamaitai talavou. Na aoga i le aoga tulagalua a Aleisa a’o avea lona tuaa ia Apulu Savali ma se tasi o sui o le komiti o mātua i totonu o le aoga.

O le tele o taimi a oo ina tuua le aoga e taumulimuli lava i ona mātua ia Apulu Savali ma Seila Savali ma ona tuagane pe a oo ina o i uta i le faatoaga, auā o le latou fanua i uta i Faleasiu i aso la, sa amata ona totō ma faafailele ai le fa’i pe ola lelei a’o avea foi lona tamā ma pulenuu o Faleasiu i lea vaitaimi. Poo le ā lava le tele o taaloga i totonu o le nuu, e lē mafai ona tosina iai lona mafaufau, e fiafia lava ia e alu i uta i le maumaga e totō tiapula, totō fualaau’aina ma fesoasoani malosi i lona tamā ma lona tina.

O le latou fanua i Faleasiu e telē ma o le nofoaga lea sa faafailele ai le tele o fualaau’aina, ma koko, fa’i ma talo e la’u atu i Samoa aemaise ai o tagata faigaluega ua la’u atu e galulue ai i totonu o le faatoaga ma ua fai ai foi fale i totonu o le fanua e nonofo ai tagata nei. Ma o le tele la o taimi e o ai fesoasoani i tagata nei i le la’uina o le vai e fui ai laau ma faga ai le vao.

Na faaauau lana aoga i le kolisi o Wesley i Faleula, ma sa faaiuina ai ma le manuia lana taumafai i le Form 6 i le tausaga 1978. I totonu foi o lana aoga i le kolisi e lei mafai lava ona suia ai le faavae o lona olaga i le fesoasoani malosi lava i ona mātua, a oo ina tuua lana aoga ona alu foi lea ua fai feau masani mo lona aiga ae o le taimi i le afiafi faatoa maua ai se avanoa e fai ai ana meaaoga.

O lona mafaufau sa iai ina ua mae’a lana aoga i le kolisi e fia alu e ave lana faafomai, peitai ane e lei manao iai lona tamā, na manao lava lona tamā e alu e faaauau lana tautuaina o le ekalesia Metotisi, ma o lea sa alu ai loa ma aoga i le aoga faafaiaoga faataitai a le ekalesia ma iu ai loa ina faauu ma faiaoga ai loa i totonu o le ekalesia i le aoga faataitai. E lei leva ona faigaluega ae toe tutupu isi manatu lelei i le toeaina e sili ai ona tuu lana galuega i Samoa ae sau i Niu Sila e saili ai se isi ona lumanai manuia, ma sa ia usitai lava i manaoga a ona mātua.

Uso ma tuagane o le tina ia Apulu Tolutasi

Uso ma tuagane o le tina ia Apulu Tolutasi

O le 1985 na malaga mai loa i Niu Sila e tali le manaoga a nai ona mātua, ae o le tausaga e 1986 na maua ai loa lana galuega seia oo i le 1987, e lei uma foi le tausaga e tasi o lana galuega ae maua loa lona avanoa i le Auckland Technical Institute e ave ai ana mataupu auā lava le faalauteleina o le malamalama ma le poto salalau i nei atunuu.

E tolu ni mataupu sa agai iai, o le Igilisi, na naunau e fai ina ia toe faalelei ai le tautala i le gagana, o le su’isu’i ma le uelo (welding) o lona manaoga i nei mataupu ia avea o ia o se tamaitai ta’uta’ua i le uelo, ma e tasi foi le tausaga na faataunuuina ai nei mataupu uma e tolu.

O le faaiuga o le 1988 na faauu ai loa i ana mataupu nei ona ua pasi uma, ma o le taimi foi lea, na alu ai tusitusiga i luga o nusipepa palagi ma nusipepa Samoa o lana faauuga ae sa faaulutala e faapea o le uluai tamaitai Samoa ua faamanuiaina i le mataupu o le uelo. Na toe tuuina mai e le A.T.I le avanoa e aoga fua ai i le inisiniaina o afi o tavale peitai e lei uma lona tausaga i lea avanoa ona ua afaina lona fatafata i le vevela o le kesi. Na toe maua lana galuega i Mount Eden i le ueloina o trailers, mafa o taavale ma nofoa ma o iina na toe sui ai loa lona mafaufau ua tatau loa ona tuu galuega faatama ae saili se galuega tau tamaitai e faaaogā ai le isi ana mataupu su’isu’i lea sa aoga ai, aemaise ai o lea ua fai lona aiga i lea taimi ma ua fai foi le fanau. Na faigaluega su’isu’i i le kamupani a le Elfin Industries, ona sosoo lea ma le Leather Court, faasolo mai ana galuega i le kamupani a le Line Seven Industries ona sosoo loa lea ma le Fonterra, na galue foi i le kamupani a le A.H. Beard seia oo mai i le Sleeping Head Ltd lea ua iva masina o faigaluega ai a’o le Aso Tofi o le vaiaso ua mavae na saini ai loa lona avanoa tumau i totonu o lea kamupani.

O le oo mai foi o le tina i Niu Sila nei ua iai loa le suiga o lona mafaufau ua tau fiafia i taaloga, auā foi ua leai ni talo, fa’i ma fualaau’aina e totō i nei taimi ae ua faaaogā loa le avanoa e lagolago ma peresitene ai i auvoli a tamaitai Pasefika i le Central e taaalo ai i totonu o Aukilani, ma o lea ‘au e fefiloi ai Samoa, Tonga ma Maoli. I le lagona o le tina i nei aso ma aso la, e faatusatusa i le matua o lona soifua ua iai, o loo tutusa lava ia te ia le malosi o loo galue ai. O lona malosi sa galue ai i totonu o lona aiga ma ona mātua i aso o lona teine muli o loo faaauauina pea lea malosi e tautuaina ai lona aiga ma lana ekalesia i le taimi nei.

Aufaigaluega a le Sleepy Head Otahuhu o lo galue ai le tina

Aufaigaluega a le Sleepy Head Otahuhu o lo galue ai le tina

O loo laualuga foi i lona manatu le taiala e manuia ai lana fanau, o le faamuamua lea o le Atua, o lana aganuu ma lona aiga, soo se mea lava e alu iai e ave lava lana aganuu na aoaoina ai ia e lona tuaa. O le fatu sa totōina e ona mātua i le taimi o lona laititi, o lea ua ia faasoa foi ma tufa atu i lana fanau ina ia latou iloa ma ola ai, aemaise lava i le aganuu a Samoa, ia iloa ona tautala ia iloa ona toaga i le lotu ia faamasani foi i le mafuta atu i tagata.

Ua fai i lagi le folauga a le tamā o le aiga a’o lea ua toe see mai e tauave le tiute faaletamā ma le tiute faatina i totonu o lona aiga. O polokalame ia a le Atua i lona soifua a’o laititi sa ia taumulimuli ai i ona mātua auā e iai le taimi e tauave ai tiute e lua i totonu o aiga ae ua iloa ona faatautaia tiute.

O le aso 31 o Aokuso na atoa iai le 60 tausaga o le tina ia Apulu Tolutasi Autagavaia ae sa faamanatuina le atoaga o lona aso soifua i le Aso Toonai i le Happy Days ona pau lea o le taimi e maua uma ai tagata o lona aiga e fiafia ma mafuta faatasi ai. O le susuga i le toeaina ia Rev Tuimaseve Gasu Misikupa sa fai ma ositaulaga i lea afiafi e momoli le taulaga o viiga ma le agaga faafetai i le Atua ona o nei tausaga e tele ua foaiina i le tina.

O le alo lona lua a le tina sa fai ma fofoga o le aso le tamaitai ia Faafetai Ulberg. Ua militino lagona ma foliga o le fiafia i aiga ma le ekalesia aemaise o sui o le kamupani a le Sleeping Head i Otahuhu i le famanatuina o le 60 tausga o Apulu Tolutasi Autagavaia. Na molimau foi le tina i le lelei o le Atua i lona ola galue ma lona ola tautua lotu e pei ona faaaogāina ai lona soifua i totonu o le ekalesia. Na faaleo foi lona agaga faafetai i ona tuagane ma ona uso faapea ona aiga ma uo ma ē masani sa auai i lona aso fiafia aemaise o lana faafetai i lana fanau ona o le latou mafutaga i totonu o le aiga. O lana faafetai i le susuga i le faafeagaiga ia Rev Tuimaseve Gasu Misikupa ma le faletua ia Pisila Misikupa o tatalo ma faamalosiau mo ia ma le fanau o loo manuia ai pea lona aiga i le taimi nei.