“E sese le faaaogā o le Fofoga Fetalai e finau ai le mataupu”…faamasinoga
E leai se silafia o le afioga i le Fofoga Fetalai susuga Laauli Leuatea Polataivao i le faamasinoga na finauina ai se tau e totogi atu i le Fofoga Fetalai i le aafia o se taavale a le ofisa o le fono i se faalavelave tau taavale na tupu i le masina o Ianuari o le tausaga e 2011.
Na fesiligia le Fofoga o le fono ina ua aumai le faaiuga a le faamasinoga lea na fofogaina i le aso 26 o Iulai o le tausaga nei ae faatoa maua mai le faaiuga tusitusia i le masina nei, o loo faaalia ai le teena o lea talosaga sa faaulu i le faamasinoga e faaaogā ai le tofiga Fofoga Fetalai o le Palemene.
E lē o ta‘ua i le faiuga tusitusia le suafa o le Fofoga Fetalai na faaauala atu ai le talosaga mo se taui o le taavale na faaleagaina i le faalavelave, o le pogai lea o le fesiligia o le Fofoga fetalai o iai nei. “E matuā ou lē malamalama lava i lena case, ma ou te lē o iloa foi pe na iai se mataupu faapena na ou tuuina atu i le faamasinoga”.
O le tausaga e 2011 na faia ai le palota tele a le atunuu i le masina o Mati lea na faatoa avea ai Laauli Leuatea Polataivao ma Fofoga Fetalai. O le paeaiga i tua atu o lea tausaga a le Palemene sa avea ai le tofa Tolofuaivalelei Falemoe Leiataua ma Fofoga o le fono ae sui Fofoga Fetalai le susuga Laauli.
I le faamasinoga lenei na tagi ai le fofoga fetalai faasaga i ni tagata se toalua o le isi o le tagata e ana le masini ua pato poo le excavator na aafia ai le taavale a le ofisa o le fono i le faalavelave. Peitai o le taavale o le ituaiga o le Toyota Hi-Ace Van na lavea e faapea sa fealuai i le laisene poo se number plate private.
O le mafuaaga lea na finauina ai le tagi i le tofiga o le Fofoga Fetalai ona o ia o loo iai le pule o meatotino uma a le fono aoao faitulafono e pei ona aiaia i le vaega 42 o le Faavae.
E manino mai foi i le faamsinoga lenei o le loia sa finauina le mataupu mo le fofoga fetalai sa ia faaaogā le pule lea a le Fofoga Fetalai e finau ai foi o le taavale o le meatotino a le Fofoga Fetalai.
Peitai o le faaiuga a le faamasinoga ua faamanino ai o le pule lea a le Fofoga o le fono o loo aiaia faaletulafono e lē faapea o le a ia umia ai o sana lava meatotino aseta a le ofisa o le fono aoao e pei o le taavale.
Na faaalia e ni molimau i le suesueina o le mataupu o le taavale a le ofisa o le fono e ui sa fealuai i se numera tuma‘oti poo se private number plate. E faamaonia lea i le inisiua o le taavale o loo lesitala i le ofisa o le fono ae totogi le inisiua e le matagaluega o tupe a le Malo.
O le faaleaogaina o le tagi a le Fofoga Fetalai ua fai mai ai foi ma le faamasinoga e sese le faaaogāina o le tulaga poo le tofi Fofoga Fetalai e taulamua i le finauina o le mataupu.
Ua totogi e le ofisa o le fono le $1,200 i lē e ana le masini ua pato na tuua‘ia e le Fofoga Fetalai na faapogai ai le faalavelave. E toaono ni tagata faigaluega a le fono na malaga ai i le taavale e aofia ai ni tagata ofisa sinia se toatolu i se maliu o se tuaa o se tagata sa faia i Lalomanu ia Ianuari o le 2011.
O le taliu mai i Apia o lea vaega o le aufaigaluega na aafia ai le taavale i le faalavelave na tupu i le nuu o Eva.
