“Ou te fiafia e faailoa atu i Sui Mamalu, e lē o iai se fuafuaga a le Malo e siitia tiute ma lafoga e faatupe ai polokalame moomia mo le atinae i le tausaga 2013/2014”…Minisita o Tupe
Ua taoto nei i le maota fono o sui mamalu o le Palemene o le atunuu le tala autu o le Tupe mo le tausaga faaletupe 2013/2014, lea ua faailoa ai e le afioga i le Minisita o Tupe o Faumuina Tiatia Faaolatane Liuga, o le a leai se siitaga o lafoga ma tiute, ae o le a siitia totogi o nisi o auaunaga a Matagaluega ma Faalapotopotoga a le Malo. Na te lē o faailoaina i lana saunoaga o le tala o le tupe poo ā tonu ia totogi o auaunaga o le a siitia, ae ua ia tautino o loo feagai le tamaoaiga o le atunuu ma tulaga ma‘ale‘ale.
“O lenei tala o le tupe o loo faavae i se tulaga o se tamaoaiga ma‘ale‘ale. E na o le 1.3% lea ua fuafua e siitia ai le tamaoaiga i le tausaga faaletupe 2012/2013 ma e maualalo ifo nai lo le siitaga sa fuafuaina a o lei aafia le atunuu i le Afa o Eveni.”
“Peitai o loo fuafua o le a siitia le tamaoaiga i le 2.5% i le isi tolu tausaga i luma atu pe a amata faagasolo polokalame ma atinae a le Malo e toe uunaia ai atinae o faatoaga, turisi faapea galuega moomia mo le vave faalelei o aafiaga o le tamaoaiga mai le Afa o Eveni”, na saunoa ai le minisita o tupe.
Taiala o le Tala o le Tupe
O le iai pea o le tamaoaiga i se tulaga ma‘ale‘ale faatasi ai ma le moomia vave o le toe faaleleia o vaega o le atunuu sa aafia i le Afa o Eveni, ua alagatatau ai ona toe siitia tupe faaalu a le Malo ina ia vave faafoisia ai le tamaoaiga i se tulaga malosi.
Mo le tausaga faaletupe 2013/2014, e 4.8% le faasiliga o tupe faaalu nai lo tupe maua o le a iai. E ui ina maualuga pe a faatusa i le tapulaa e 3.5%, ae tumau pea le talitonuga ua talafeagai lea tulaga ona o galuega faatino e toe fia faaleleia ai mea sa faaleagaina i le Afa o Eveni.
O le siitia foi o tupe faaalu o le a fesoasoani tele lea e unai ma faataavili ai le tamaoaiga, ma e ogatasi lava ma faailoilo o le tulaga tau tupe o loo iai i le taimi nei. O le tau o le soifuaga o loo maualalo e 0.2% sa iai ia Mati 2013, a o tupe faaagaaga mo fefaatauaiga, e gafatia le 5.3 masina o oloa faaulufale mai fafo.
I le tulaga o tupe maua, e lē o iai se fuafuaga a le Malo e toe siitia lafoga ma tiute e faatupe ai lenei tala o le tupe.
Ona o le naunautaiga o le Malo e siitia le auaunaga a nisi o Matagaluega ma Faalapotopotoga, o lea ua a‘e ai le tofa o le a iloiloina fua togipau o ia auaunaga ina ia maioio manino ai le fesiitai pea o le tau atoa o loo faatino ai e le Malo ia auaunaga mo le manuia o le atunuu lautele.
Ou te faamauina foi le faaopoopoina pea o le tele o fesoasoani tuusa‘o i le tala o le tupe e tauala mai i Malo ma Faalapotopotoga o loo faipaaga ma lo tatou Malo, ma ua fesoasoani tele lea i le faatupeina o a tatou atinae. Ua atagia mai ai i lea tulaga le talitonuina e a tatou paaga o le lufilufi lima lelei o le Malo i le faasoasoaina o ia seleni mo le manuia o le atunuu lautele.
O le faasiliga o tupe faaalu nai lo tupe maua mo le tausaga faaletupe 2013/2014 o le a faatupeina lava i nonogatupe e māmā ma maualalo tului. Ae mo le agai atu i le lumanai, o loo tumau pea le agaga maualuga o le Malo ina ia ausia le tapulaa e 3.5% i totonu o le tolu tausaga o lumanai.
OTOOTOGA O LE TALA O LE TUPE
O le otootoga lenei o le Tala Faatatau Autū o le Tupe mo le Tausaga 2013/2014:
Tupe Maua: $760,393,859
Tupe Maua Masani: $538,290,566
Tupe Faamealofa mai Fafo: $222,103,293
Tupe Faaalu: $841,240,564
Tupe Faaalu Faaletulafono: $85,588,385
Tupe Faaalu i Polokalame: $549,702,468
Tupe Faaalu i Atinae: $189,458,637
Tupe Fa’aalu Le Fuafuaina: $16,462,454
Faasiliga o Tupe Alu i Tupe Maua: ($80,846,705)
Faatupeina mai:
Nonogatupe e māmā tului: $120,340,939
Tupe Faasili: $39,494,234
O le aotelega o le Tala Faatatau Autu o Tupe 2013/2014 o lo’o atagia ai se faasiliga o tupe fa’aalu nai lo tupe maua e tusa lea ma le $80.84 miliona tala. Ua mafua lea tulaga ona o le amata faatinoina o polokalame e toe faaleleia ai vaega sa aafia i le Afa o Evani faatasi ai ma tapenaga o le talimalo o Samoa i le fonotaga a atunuu e laiti (SIDS Conference) e usuia i le 2014.
A faaliliuina le faasiliga o tupe faaalu nai lo tupe maua i le tulaga o fuainumera o le tamaoaiga, ona tulai mai ai lea i le 4.8% o le tamaoaiga ma o le a faatupeina lava i nonogatupe e maualalo le tului i lona aotelega e $120.3 miliona tala.
Faaalia e le Minisita o Tupe le afioga Faumuina, e ui ina foliga e maualuga le 4.8% e pei ona ou ta‘ua muamua, ua matauina ua maualalo atu pe a faatusa i le 6.1% sa faamauina i le tausaga ua tuanai atu.
O lea tulaga ua atagia ai le faatāuaina e le Malo o se tasi o taiala tāua o le ausia lea o le tapulaa e 3.5% o le faasiliga o tupe faaalu nai lo tupe maua i le tamaoaiga i se taimi vave. E telē foi le sao o a tatou paaga i taumafaiga a le Malo e saga faaitiitia ai lea pasene e ala i le siitia maualuga o a latou fesoasoani e tuusa‘o i le tala o le tupe a le Malo mo le tausaga 2013/2014.
