“O le a silasila pea le Malo e fetuunai ma faia siitaga o totogi i auaunaga a le Malo”
Ua taoto nei i le laulau a fono a le Palemene o le Malo Tutoatasi o Samoa le tala autu o le Tupe mo le tausa ga faaletupe o lumanai nei, 2014 i le 2015 e amatalia ia Iulai o le tausaga nei ae mae‘a i le faaiuga o le masina o Iuni o le tausaga fou.
E lē o iai se fuafuaga a le Malo i le tala autu o le tupe e toe siitia lafoga totogi ma tiute ae o le a silasila pea i le siitia o totogi o auaunaga a le Malo e pei ona faaalia e le Palemia o le minisita foi lea o le tupe le susuga Tuilaepa Lupesoliai Salele Malielegaoi, o le a agai lea fuafuaga i Matagaluega ma Faalapotopotoga a le Malo e lei aofia i le siitaga o a latou auaunaga i le tala autu o le tupe o le a mae‘a, e pei ona siitia ai le totogi o auaunaga faalesoifua maloloina.
I le otootoga o le tala o le tupe a le Palemia ua fuafua ai se aofaiga e $722 miliona 962 afe ma le 208 tala e auala mai i tupe maua masani lea e faatatauina e $544 miliona 910 afe ma le 258.
O tupe faameaalofa mai fafo e $178 miliona, 51 afe ma iva selau lima sefulu (950). O le aotelega o le tala o le tupe ua faamoemoe e faamauina ai se fasiliga o tupe faaalu nai lo tupe maua e $69 miliona ma le selau afe ($69.1), tusa lea ma le 4 tesimale 2 pasene o le tuuaofaiga o le tamaoaiga.
O le faaitiitiga o le faasiliga o tupe alu nai lo tupe maua mai e 4 tesimale 8 pasene ile 4 tesimale 2 pasene mo le tausaga fou, ma ua manino ai le naunautaiga o le Malo e pei ona saunoa le minisita o tupe o le a ausia ai le tapulaa e 3 tesimale 5 psene o le tamaoaiga ile tolu tausaga o lumanai. Faaalia e Tuilaepa o le faasiliga o tupe faaalu nai lo tupe maua mo le tausaga faaletupe o lumanai nei (2014/2015) o le a faatupeina lava mai nonogatupe e mama ma maualalo tului poo soft term loans.
O se suiga i fuafuaga a le Malo i le tala autu fou o le tupe ona o le a siitia tupe maua i le tasi le pasene pe a fua i le tausaga faaletupe 2013 i le 2014, peitai na ta‘ua e Tuilaepa i le Palemene o tupe faameaalofa mai fafo o le a faaitiitia i le 27 pasene ona ua tau faaiuiu galuega toe faaleleia o le afa o Evani.
O le 792 miliona o le aofaiga o tupe faaalu mo le tausaga faaletupe o lumanai nei a le Malo o Samoa, e tusa o le 49 miliona ua faaitiitia ai, pe a fua i le tausaga faaletupe 2013 i le 2014.
Ua mafua lea ona ua tele ina mae‘a galuega toe faaleleia o le afā o Eveni na agi i le masina o Tesema o le tausaga e 2012.
O le fuafuaina o galuega a le Malo ma tupe o le a faaalu ai ua taoto mai ai o le Matagaluega o A‘oga, Taaloga ma Aganuu e 84 miliona ua faaagaga i ai.
O le Matagaluega o le Soifua Maloloina e 81 miliona 9 selau afe. Matagaluega o Faatoaga e 13 miliona 8 selau afe. O atinae tetele a le Malo e pei o le eletise e 11 miliona 250 afe. Pulega o le suavai e 20 miliona 11 afe.
Auala tetele ma auala sima i vaitafe e 23 miliona 9 selau afe. Fesootaiga tau tekonolosi e 2 miliona 100 afe tala. Tapenaga mo le fono a malo laiti o le lalolagi poo le SIDS (Small Islands Developing States) e 10 miliona. Taaloga a tupulaga talavou a Malo o le Taupulega o le a faia i Samoa i le tausaga fou, e 5 miliona.
O le saunoaga a le Minisita o Tupe na ia faataatia ai foi ma se tala faaopoopo o le tupe e faamae‘a ai galuega o le tausaga faaletupe o loo iai nei, lea e mae‘a i le faaiuga o le masina nei o Iuni e tasi le miliona 9 selau afe.
