Ua fiu faipule o le Tautua Samoa e toe lalaga i luga le mataupu o le palota mai fafo o tagatānuu o Samoa ua aumau ma alaala ai, e lē o toe maluelue le faigamalo a le alii Palemia o Tuilaepa L Sailele Malielegaoi.
O loo tausisi lava le taitai o le Malo i le mau ua mae‘a ona faailoa, e taugata le faatupeina o le faafoega o faigapalota a Samoa mai atunuu o aumau ma nonofo ai tagata Samoa e agavaa ona palota.
O loo faaalia lava e le alii Palemia, e sili atu le faigofie o le tulaga o iai nei, o le malaga mai i Samoa o tagatānuu ma lesitala, ma faia ai a latou palota.
Na fesiligia le afioga Palusalue Faapo II o le Tautua Samoa, pe na te lagolagoina se finagalo o le Palemia na faaalia muamua i le mataupu lenei, e lē o se mea lelei le faia mai e tagata Samoa o i fafo o le faaiuga o le faipule o se itumalo ae o loo nonofo tagata o nuu ma afioaga ma fai le tautua.
Na fesiligia foi Palusalue pe o le ā sona lagona ae mae‘a ane le palota ua fai e tagata Samoa i fafo le faaiuga o ia, i le lē manuia ae manumalo se isi faipule.
E lei tali manino le faipule i fesili ae sa ia faaalia e faigata ona talitonuina le manatu lea o le Palemia i le fai e tagata palota o Samoa o alaala i fafo o faaiuga, auā e lei faia lava e le Malo se suesuega pe toafia tonu tagatānuu o Samoa o aumau i Niu Sila ma isi atunuu e agavaa ona palota.
O le isi vaega na faaalia e Palusalue, e mafai ona fai ni aiaiga e taofia ai le soona palota mai fua o tagatānuu Samoa e lē o agavaa ai.
O loo iai le talitonuga o nisi faipule o le Itu Agai, o loo matuā fefefe le HRPP i le tatala loa ona fai mai fafo o palota a tagata Samoa, auā e iu ina fai mai ai e latou ma le faaiuga o se faigamalo e tulai, e faatautaia upufai o le atunuu ae o loo nonofo tagata i Samoa ma tautua ai i galuega ma isi atiina‘e.
Ua folafola e le Tautua Samoa afai ae manuia a latou tapenaga i le palota o le 2011, o le tasi lea o fuafuaga e oo i ai a latou pulega, o le tatala loa ona fai mai palota a tagata Samoa e agavaa i atunuu o loo aumau ma nonofo ai.
O se avanoa ua faaalia ua leva ona talotalo i ai nisi o le atunuu ua aumau i fafo, ona e taugata tele le feoai mai e lesitala ma toe malaga mai i Samoa e fai lana palota.
O se mataupu lenei sa laga foi i nisi o faigapalota ua mavae, ae e lei taunuu lava ona faatino ona o loo manumalo pea le HRPP o loo finau e taugata le faatino o lea tulaga.
