O nisi nei o vaega na mafai ona faamauina mai i le sueina o tusi a le Ofisa o Konesula i Amerika Samoa mo tausaga faaletupe faaiuina 30 Iuni 2011, 2012, 2013, 2014.
1. E lei faanumeraina pei ona tatau ai pemita e tusa ma faiga faatausi tusi lelei. O le faatulaga lelei o fuainumera e faigofie ma fesoasoani ai le faapaleniga o pemita na maua ma faapea ona tuuina atu e le ofisa, ma faatusatusa ai i tupe maua mo le manino ma tusa ai ma faiga faatausitasi. Na tali le matagaluega ua faia nei lea tulaga ma o le a tulimataia pea lona faagasologa.
2. E leai ni vaega tupe mo mea mea laiti, ma e tele na faaaogā tupe a le Konesula ae toe totogi mulimuli e le ofisa. O lenei tulaga ua faaleaogāina ai le mafuaaga na ala ai ona faia lenei vaega tupe mo mea laiti, ma ua fautuaina ai e le suetusi le tatau ona mulimulitaia faiga faavae a le Malo e pei ona masani ai. Sa tali le matagaluega e lei iai se tupe totoe mo le vaega tupe mo mea laiti i le taimi o le suega o tusi. Mo le nofo silafia foi, sa iai tupe na leiloloa i le nofoaga o le ofisa ma manatu ai le pulega e le saogalemu ni tupe e teuina i totonu o le ofisa. O lenei vaega tupe o loo faaagaoioi ma pulea lelei e le ofisa e tusa ai ma faiga faavae masani.
3. E leai se sefe e teu lelei ai tupe maua i aso taitasi. E tatau ona puipui malu uma i se nofoaga lelei aemaise o tupe nei a le Malo. Ua faamauina e le matagaluega nei atugaluga ma sa taumafai le ofisa e saili se sefe mautu; peitai o loo faagasolo pea i faiga pei ona masani ai, ma o loo iai lava faamaumauga mautu o faamatalaga o tupe.
4. Mataupu e patino i le aufaigaluega ma aso malolo:
* E leai se konekarate na sainia mo le Konesula i le 2009-2012. E tatau ona sainia ma atoatoa nei konekarate e maioio lelei uma ai matafaioi, faapea ai ma isi tulaga e agavaa iai. Na faamatala e le matagaluega e tutusa pau uma aufaigaluega a le Malo o i fafo e leai ni konekarate ae na’o aiaiga e pei ona masani a’i le aufaigaluega i fafo, e pei lava ole aufaigaluega tumau. O loo mulimulitaia lava foi faatonuga a le Kapeneta e patino i le faafaigaluegaina o le aufaigaluega i fafo, ma a iai lava suiga i aiaiga ua faatino e pei ona talafeagai ai.
* O aso malolo faaletausaga mo le Konesula sa faaputu ae lei faaaogāina, ma e le’o o gatasi ma le Faaiuga a le Kapeneta FK(08)33 and FK(08)43 sa faalauiloa mai i le 2008 mo tulaga faakonekarate i le Malo. Sa aofia foi i totonu o le konekarate a le Konesula mo le 2012-2015 lenei aiaiga e le tatau ona faaputu aso malolo.
Sa fautuaina le Ofisa ina ia usitaia faatonuga ua tuuina mai e le Kapeneta faapea faiga faavae ma taiala faataatitia. Na tali le matagaluega o aufaigaluega i atunuu mamao e le’o ni aufaigaluega faakonekarate pei ona masani ai. Sa faamalosia uma nei faatonuga i aufaigaluega i atunuu mamao ma usitaia, e pei ole aso malolo mo gasegase sa mafai ona faaputu ma tauave i isi tausaga.
* E leai ni pepa o talosaga mo aso malaolo sa faatumu e le aufaigaluega sa ave o latou aso malolo. E tatau ona mautu ma atoatoa uma nei faamaumauga ma faamaonia e Sinia e pei ona tatau ai. Na tali le matagaluega o loo usitaia uma pea nei tulaga. * E lei totogia ni Supaaneueta (superannuation) mo le ofisa e pei ona iai tulafono mo le aufaigaluega I Amerika Samoa. E tatau i le ofisa ona fesiligia nei tulaga i tulafono ina nei lavelavea i nisi tulaga ona o le lē malamalama. Ua faamauina e le matagaluega le atugaluga ma faapea mai o aufaigaluega uma i Amerika Samoa e i lalo o le faamalu a le Malo Aufaatasi i Niu Ioka (New York ma) mo ni popolega ma mataupu e faasino uma i le latou ofisa. Sa faapea mai foi le Ofisa o lenei mataupu ua soalaupule ma ofisa e tatau ai i le tele o taimi ma e leai lava se faaiuga mautu ua maua mai.
