“Ou te faatonuina le satini o le maota e ave i fafo sui” Fofoga Fetalai
E lei popole sui faipule o le Tautua Samoa i le faaiuga ua soloia ai o latou tofi faipule o le Palemene, ae na auai lava i taualumaga a le fono aoao faitulafono i le Aso Gafua 15 o Iuni 2009 ina ua toe amatalia le palemene mo le talanoaina o le tala autu o le tupe mo le tausaga faaletupe 2009-2010. E ui foi ina sa faatonuina le au faigaluega a le Fono Aoao e taofia le ulufale i le maota fono o sui o le Tautua Samoa pe a oo i le taimi e gasolo atu ai faipule peitai, e lei manuia lea gaioiga ona na ulufale faamalosi lava sui e toaiva o le pati ma nofoia o latou nofoa i le itu i sisifo o le maota fono i Mulinuu.
Na ulufale le Fofoga Fetalai ma tutulai uma sui mamalu o le palemene e pei ona masani ai ma amata loa taualumaga i le tatalo a le Fofoga Fetalai, peitai na maea ae tulai le alii Palemia o le taitai o le HRPP ma saunoa i le tulaga ua vaaia, i le toe auai atu o faipule o le Tautua Samoa ae ua uma ona faia le faaiuga ua soloia ai o latou tofi. Na faaalia le faanoanoa o le taitai o le Malo ona o se foliga lea e iloa ai le le amanaia e sui o le mamalu o faaiuga a le nofoa, aemaise o lo latou toe soli o le Palemene o le atunuu. Na taumafai ane nisi o sui o le Tautua Samoa e pei o le afioga Palusalue Faapo II, e tapa se avanoa mo se latou faamatalaga e tusa o le faaiuga na faia e le fofoga o le fono i le aso 29 o Me 2009.
Peitai sa le faatagaina e le Fofoga Fetalai. Na taumafai ane foi le taitaifono o la pati le tofa Lealailepule Rimoni Aiafi, peitai na saunoa le Fofoga Fetalai ua avea le toe ulufale o sui ma tulaga ua noatia ai le palemene mai le faatinoga o ana galuega ua faatulagaina, ma ia toe faamamafa ane foi le le toe iai o se avanoa e soalaupule ai lana faaiuga. Na ia saunoa foi e ao i sui ona talia le latou tagi ua faaulu i le faamasinoga ae le o le faia o se isi tulaga e atagia ai lo latou le amanaia o le faaiuga a le nofoa. Sa faatonuina ai loa e le Fofoga Fetalai le tofa Tolofuaivalelei Falemoe Leiataua, le alii satini o le maota (sergeant at arms) e ave i fafo sui uma o le Tautua Samoa. Sa lagona le siufofoga o le sui o Falealupo le afioga Aeau Peniamina, i lona talia o le faaiuga ma le finagalo o le Fofoga Fetalai ma ia faailoa ai o le a latou tuua le maota fono.
Mafuaaga o le ulufale o sui
I se feiloaiga ma tusitala i lo latou ofisa autu o loo i le maota o le Ioane Viliamu i Tamaligi i Apia, na avea ai le afioga Aeau Peniamina o se tasi sa avea ma Fofoga Fetalai i se tasi o paeaiga ua tuanai a le palemene na sui o le Tautua Samoa e faamatala le mafuaaga na ulufale ai i le Palemene. “Sa matou fono ma maua le tasi e matou te auai pea i le fonotaga a le palemene o le atunuu, i lo matou talitonuga e lei aveesea o matou tofi faipule ona e lei logoina aloaia e le Fofoga Fetalai i matou”. O le tasi itu na mafua ai, ona sa iai se lagona o sui o le latou faafaletui e savalia pea le palemene mo se isi auala e mafai ai ona momoli atu so latou lagona e tusa ai o le faaiuga. Peitai ina ua saunoa ane le Fofoga Fetalai ma faatonuina i latou e tuua le maota fono, na maua ai lona lagona o lea la ua avatu tonu le faaiuga ma ua tatau loa ona latou usitaia.
E oo mai i le taimi nei e le o faigofie i sui e toaiva o lea pati ona talia le tulaga ua oo i ai o latou tofi faipule mo nai o latou itumalo na filifilia i latou. O le autu foi lea o le latou mau ua ave i le latou tagi e soli faavae le faaiuga ua faia, ma e leai se malosiaga faaletulafono o le Fofoga Fetalai e na te soloia ai se tofi faipule o se sui o se itumalo, seia vagana nisi o aiaiga o tulafono tumau e mafai ai ona faamalolo le tumau se sui faipule pe suspend. O le vaega 47 o le Faavae o le Malo Tutoatasi o loo autu i ai lea mau a le Tautua Samoa.
O le vaega 46 o le Faavae o loo faasino i le pule a le Fofoga Fetalai e faagafua ai se nofoa o se itumalo i le Palemene o loo faavae ai le faaiuga a le Fofoga Fetalai. O le asō, aso 22 o Iuni 2009 o le a valaauina ai le tagi a le Tautua Samoa mo se poloaiga le tumau e taofia ai le faaiuga, atoa ai ma se isi vaega o le tagi o loo tatalo ai mo se vaegatupe e $10 miliona 250 afe tala e totogi atu e le Fofoga Fetalai ona o le faaleagaina o i latou i lana faaiuga.