Leai se isi alofaga o le lē toe aooga o fanau

O le vaiaso lenei ua toe amata ai aoaoga mo fanau i aoga laiti poo aoga tulagalua i Samoa. O se suiga o le a amata atu i lenei tausaga e pei ona lipotia muamua atu i Samoa nei, o lea o le a aooga fua fanau uma o loo aoaoina i aoga tulagalua a le Malo (Government Primary Schools).
O le fesili tele ua laga ma ua mulimulitai ai foi, pe faamata o le a le toe vaaia le tulaga e pei ona iai ata o le lipoti lenei.
O le tele o fanau o loo feoai lava i le taulaga e faatau oloa o loo tau faasavali aua le sailiga o se seleni.
O le tasi lava lenei o mafuaaga tele na laga ai lenei tulafono fou, ua faamalosia ai nei loa le tulafono ua leva ona iai, ina ia aooga uma fanau mai le lima tausaga le matutua seia oo atu i le matua ua atoa ai le 14 o tausaga.
Mo le tele o tausaga e ui ina sa faatulafonoina lava e tatau ona aooga fanau i le matutua lea peitai e lei faamalosia.
O lea la ua aooga fua fanau ua matua faamalosia ai ma lenei tulafono.
O le vaaiga taatele i talafatai o Apia faapea Salelologa, o fanau ua feoai ma atigipusa e faatau ai soo se ituaiga oloa mai taumafa e oo lava i maa moli uila, o fasimoli, pele ma soo se ituaiga oloa.
O le tele o matua ua tapa i le faaaoga o fanau e faia nei galuega, na o latou taua e lelei tamaiti e vae mama.
O le faafitauli tele lava la o le itu lea ua oo lava i taimi o aoga o loo faaaoga lava nei fanau e faatau ia oloa.
O le taimi mulimuli na talanoaina ai lenei mataupu na laga ai loa le vaega o le a vaaia le faamalosia o lenei taumafaiga e pei ona lagolagoina ai e le Matagaluega o Aoga, Taaloga ma Aganuu.
O le isi lava lagolago malosi o lenei faamoemoe o le pulega lea a Alii ma Faipule o afioaga uma o loo faatuina ai aoga a le Malo.
O Pulenuu ma komiti o aoga taitasi ua ave i ai le tiute o le siaki uma o aiga ma fanau e tatau ona aooga poo aooga tamaiti. O le isi tulaga o leoleo i nofoaga faitele aemaise o nisi o loo talia le tofia e taamilo ma faatino lenei galuega o le faamalosia lea o fanau laiti nei e agai i faleaoga.
O le tulafono lenei o le a faasala ai matua pe afai e maua atu fanau e lei avea i le aoga.
O le nofoaga aupito toatele fanau e faatauina oloa o loo vaaia ai e pei o ata nei na tapue i le vaiaso na tea nei, o le Maketi o Fua o Faaeleeleaga i Fugalei. O le nofoaga foi la lea o le a mautinoa le mataituina e le atunuu pe o le a faaauau ona vaaia ai fanau o faia nei galuega.
O loo faataga le faatau o fanau pe afai ua tuua aoga ae o le puipuiga ma le tulafono o loo faamalosia lava i taimi o aoga.