Ua lē taunuu fetauiga poo fusuaga sa fuafuaina i le va o le alo o le atunuu, Sonny Bill Williams, ma lana paga le alii o Richard Tutaki.
Ona talu ai o ni moliaga solitulafono o loo aafia ai le alii taalo o Tutaki, ua faamaonia mai ai e lē mafai ona taalo ma ua lē faataunuuina ai ma le taaloga e pei ona sa fuafuaina i le aso valu o Fepuari poo le masina fou.
A o feagai ai nei le au sue fusuaga ma le au taufaaosooso i faipelega, ae ua faailoa manino ma faamaonia mai e le Peresitene o le Asosi o Fusuaga Faapolofesa a Niu Sila, Lance Revill (New Zealand Professional Boxing Association) e faapea, e ui lava ina ua toe faaui ese le igoa o Tutaki mai le fetauiga ma Williams, peitai e faaauau pea ona taalo le susuga ia Sonny i le aso e pei ona ua mae‘a ona faalauiloa muamua.
O le finagalo o Lance Revill, o loo galulue malosi le au faalauiloa fusuaga e saili se paga a SBW i le taimi nei, ma e mautinoa lava e maua e leai se faaletonu. O le isi tagata o loo foliga mai e ono tali vave mai i le sailiga o loo fai nei, o le alii lapoa o Joey Wilson o Aukilani. O ia lea na muai valaau ane lana faiaoga ma fesiligia, pe aisea na lē ave ane ai le faamuamua a SWB ia te ia, ina ua faato‘ā saili sana paga i le taimi muamua. O le avanoa lea sa tuuina i lē ua toe faaui ese lona igoa ona o moliaga o loo feagai ma ia.
E toalima i latou na faia i ai le filifiliga muamua mo se tasi e taalo ma SBW, ae na ave le faamuamua ma talia le alii o Tutaki, o lona uiga e lē saili gata se tasi e faaauauina le avanoa e pei ona iai i le taimi nei. O le afiafi o le Aso Toonai na tea nei aso 14, na faalauiloa ai le faaiuga e aveese Tutaki mai le fusuaga ona o loo sauni i le faamasinoga ma moliaga i fualaau faasāina e pei ona lipotia.
Moliaga o Richard Tutaki
Ua faamaonia foi i lipoti a le nusipepa a Niu Sila, le Herald e faapea e tusa ma le sefulu moliaga o loo molia ai Tutaki. O ia moliaga e sefulu e aofia ai fualaau faasāina, o le lē usitaia o tuutuuga ma aiaiga a le faamasinoga, o le gaoi o meatotino faatolu ona fai, oso faamalosi i se taavale, ave taavale matautia, lē mafai ona tu i taofiga a leoleo, atoa ai ma le tuuina o faamatalaga sese i leoleo.
O ia moliaga uma, faaopoopo i ai ma le lē oo ane i le poloaiga a le faamasinoga, na mafua ai ona ave se poloaiga malosi e ave faapagota ma taofia ai e leoleo i le Aso Lua na tea nei, ma o loo taofia pea seia toe valaauina i se aso e le Faamasinoga.
Ae ua faailoa foi e le Peresitene o Fusuaga a Niu Sila, Lance Revill, ua tatau i soo se tasi lava e fia taalo ia SBW ona tapenapena auā ua toe tolu vaiaso ona faia lea o le taaloga. O le a faataunuuina lava lea fusuaga i le nofoaga e pei sa faalauiloa muamua, le Claudelands Arena i Hemilitone i le aso valu o Fepuari.
O le a fofogaina lava se tasi poo ai o le a vave sii lona lima e talia le fanoga o le alii lakapi liki toe fusu o Sonny Bill Williams.
